Zanina Europa League khel tur an hrawl; Man United, Juve leh AS Roma inlan dawn
European football inelna ngaihhlut pahnihna - Europa League quarterfinal chu zanin hian khelh ṭan a ni dawn. Team inlan tur zingah Manchester United, Juventus leh AS Roma an tel avangin a boruak a te thei lo.
Roma manager Jose Mourinho chuan hmanni deuh khan Champions League aṭanga tlate chu tla tlang mai se, a hnuai lam Europa League khelh kher a ngai lo tiin Juventus a lo kap tawh - inelna hi a boruak a nung chho dawn hle.
United inlan hun
Erik ten Hag-a'n nasa takin Manchester United a siam danglam a, hun rei tak hnuah League Cup pawh an chawi thei. Nomawi an chawi laia Man United fans titi tui tak mai chu, tun season chhunga title dang an la beisei thu a ni.
Premier League nomawi erawh beiseina la tawp loh mah se an lak a rinawm tawh loh. Europa League leh FA Cup erawh an kuta innghat a la ni, zanin dar 12:30 hian Spanish team Sevilla chu Old Trafford-ah an lo mikhual ang.
Tun hmain European football bikah Man United hian Sevilla hi an la hneh ngai lo! Europa League 2020 semifinal kha an intawn hnuhnung niin an chak lo. English team hrim hrim an hmachhawn hnuhnung pariatah a dingchang zawk an ni vek.
Sevilla hi khualmuala European football an khelh hnuhnung 11-a chak ni hmel hmu lo an ni a, tun hi Ten Hag-a naute tan chuan hnehna hlado chham theihna remchang tak a ni. Old Trafford-ah Spanish team hian tlawm loh hrim hrim an tum thungin a rinawm.
Rashford a chiang lo
Erik ten Hag-a'n Manchester United a enkawl chinah, forward Marcus Rashford hi harhtharna chang ṭha leh a theihna pho chhuak nasa berte zinga mi a ni. Dutch manager pawhin a chungah rinna a nghat nasa thei hle.
Mahse, England international hi Everton nen Premier League an khelh ṭumin hliam vanga lak chhuah a ni a, zaninah hian a inlan thei dawn em, tih a chiang theih rih lo. Toffees nen an inkhelh zawh hlim khan Ten Hag chuan Rashford hi ni hnih vel an ngaihchan tur thu a lo sawi tawh a ni.
United tana chanchin lawmawm erawh Casemiro a khel thei dawn, chutih rualin Brazil captain hian yellow card a hmu leh a nih chuan match khat khel thei loa hrem hmabak a ni, fimkhur taka a inkhelh a ngai dawn - inkhel turin Christian Eriksen a inpeih bawk.
Ten Hag-a naute hi rinkai zawk chu an ni ngei mai, mahse Europa League a nih tawh chuan Sevilla hi dah hniam theih an ni lo, kum 2006 chinah ringawt pawh vawi ruk champion tawh an nih avangin English club hmachhawn hi an huphurh hran bik lo ang.
Pogba a training
Juventus tan tun season chhungin Paul Pogba a la inkhel mumal meuh lo tia sawi theih a ni. France international hi hliamin a tlak buak nasa, tun hnaiah erawh team training a zawm pangngai tawh, zanina Sporting an mikhual hunah coach Massimiliano Allegri tan duhthlan theih zingah a tel.
Old Lady chuan thuchhuah siamin, "Pogba a lo kir thei ta hi club leh fans tan chanchin lawmawm a ni. Europa League-ah hlawhtlin ngei kan duh, chumi tur chuan Pogba hi a pawimawh," an ti a, tun hmain Manchester United a lo champion pui tawh avangin a lakah beisei an nei sang.
Juve hi dan an bawhchhiat avangin Serie A point 15 paihsak an ni, chuvangin an tan league title lak beisei chi a ni tawh lo. Chuvangin Allegri naute hian Europa League hi an ngaipawimawh zual dawn - season thar UCL khel tura ticket neih theihna a ni tel bawk.
Sporting hi dan hniam ngawt theih erawh an ni dawn bik lo. Portuguese club hi Premier League hmahruaitu Arsenal pet chhuaktu an ni a, coach Rúben Amorim hoin Italian club ṭha pawh hi pet chhuah leh an tum ngam ang.
Mourinho awmna
Jose Mourinho a nih tawh chuan nomawiin a zui ṭhin. Portuguese manager hian season hmasa khan AS Roma chu Europa Conference League nomawi a chawipui, tun season kal laiah pawh Serie A table-ah pathumna an ni mek.
Roma hian zanin dar 10:15 hian Feyenoord an lenchilh dawn. Feyenoord hi Ajax chunga awmin Dutch league hmahruaitu an ni mek thung a, awlsam taka nuai liam theih chi an ni dawn bik lo - inkhel a hmuhnawm ngei ang.
Hriatreng tur chu, season hmasa Conference League final-ah khan team pahnih hi an inhmachhawn - Roma an chak zawk. Feyenoord coach Arne Slot chuan, "Roma hi an coach ngai Jose Mourinho hoin an la ni a, player ṭha tak tak Paulo Dybala, Nemanja Matic leh Gini Wijnaldum te pawh an nei.
"An khelh dan hmang hi a la ngai reng, ka ngainat zawng erawh a ni lo," tiin mahni goal venhim tum taka inkhelh chu a ngaina lo, zaninah pawh Dutch team hi chuan goal khung tumin an nawr ngei dawn tih a hriat theih.
Europa League - Zanin Inkhel Tur
Quarterfinal First Leg
Feyenoord 10:15 PM AS Roma
Juventus 12:30 AM Sporting
Man United 12:30 AM Sevilla
Leverkusen 12:30 AM Union Saint-Gilloise