A tawpah Mumbai Indians

Thawhlehni zan khan Indian Premier League-ah inkhel hmuhnawm bik chhawp chhuah a ni a, ball tawp berah a chak zawk chinfel a ni chauh. Mumbai Indians-in wicket rukin Delhi Capitals an hneh a, cricket ngainatute tan ennawm hmuhnawm a tling.

Arun Jaitley Stadium-ah Mumbai-in vawm hmasak an thlang a, Delhi-in over 20-ah 172 runs an siam. Team pahnih hi chak la nei lo ve ve an nih avangin boruak a sang a, Mumbai hi ringkai hret an nih ang ngeiin bul an ṭan ṭha zawkah a ngaih theih.

Delhi tan captain David Warner (51) leh Axar Patel (54) ten half century siam mah se an run siam hi chak nan a tam tawk lo. Mumbai tan captain Rohit Sharma-a'n ball 45 aṭangin 65 runs a siam a, Ishan Kishan (31) leh Tilak Varma (41) ten an thlawp ṭha bawk.

Mumbai hi awlsam taka chak tura ngaih tawh ni mah se Suryakumar Yadav-a'n run khat pawh siam loin ball a hmachhawn hmasa berah pavillion-ah a kir. Tim David leh Cameron Green te kutah Mumbai an innghat a, anni pahnih hian South African bowler Anrich Nortje an ngam lo.

Over 18-naah Nortje hian vawmin run ruk chauh a pe a, Mumbai hian over hnuhnung pahnihah chak turin 20 runs an siam a la ngai. Over 19-naah David leh Green ten six vawi khat ve ve an pe a, Delhi bowler Mustafizur Rahman-a'n 15 runs a pek avangin Mumbai dinhmun a ṭha leh ta zawk.

Over tawp berah Nortje bawkin a rawn vawm a, ball khatnaah run khat pe mah se dot ball vawi hnih a vawm zui. Mukesh Kumar-a'n Tim David ball vuak a thlauh a, Mumbai dinhmun a ṭha tam ta lo.

Mumbai-in ball lina leh nganaah run khat ve ve an siam a, Delhi lam fielding a ṭha tawk lo. Ball tawp berah Mumbai tan run hnih siam a la ngai a, Tim David-a'n vaw fuh tawk lo mah se vawi hnih an tlan a, Delhi fielding ṭhat tawk loh vangin Rohit Sharma hote an chak hram.