NBA playoff khel tur James awmna Lakers

Lebron James hoin Los Angeles Lakers chuan NBA playoff an khel dawn, nimin zing play-in inkhelah Lakers hian Minnesota Timberwolves chu over time an khelhpui hnuah 108-102 in an hneh.

Lakers hian kum 65 chhunga season bul an ṭan fuh loh ber ṭum an tawng, an match hmasa pangaah an tlawm vek. Tluk leh din fawmin regular season an hmang chhunzawm, insiamṭha viau mah se Western Conference-ah parukna an ni phak lo.

Playoff khel phak tur chuan play-in an paltlang a ngaih phah. Timberwolves lakah hian James chuan minute 45 a khelh chhungin point 30 a nei a, rebound ṭum 10 la bawkin double-double a ni.

James bakah Anthony Davis chuan point 24 a nei, anni pahnih hi dam ṭha taka an khel dun thei a nih chuan team dang tana hmachhawn châkawm loh tak an la ni reng a, playoff chinah pawh tawh an khirh viauin a rinawm.

Lakers thiampuipa James chuan, "Kum tluanin fiahna kan hmachhawn a ni ber a, a hautak khawp mai. All Star Game kan neih hnuah kan khel ṭha sawt a, chu chuan nasa takin min pui tih kan hria.

"Basketball inelna hi chu a hluin a ngaihnawm, a bik takin April thlaa playoff khelh ngei mai hi chu a inhmehin NBA nen hian a inzawm hle a, kan tan chuan chumi khel ve phak nih aia hlu a awm chuang lo," a ti.

Lakers hian playoff-ah chuan Memphis Grizzlies an hmachhawn ang. Chak lo zawk Minnesota tan pawh kawng a la inhawng, seeded pakuana leh 10-na New Orleans Pelicans leh Oklahoma City Thunder inkhela chak zawk an la hmachhawn leh ang.

Eastern Conference lamah Atlanta Hawks chuan Miami Heat chu 116-105 in an hneh a, playoff khel turin an tling. An hmabaka ding tur chu Boston Celtics an ni dawn - Celtics hi regular season hman zawh taka pahnihna kha an ni.

Heat hian Chicago Bulls leh Toronto Raptors inkhela chak zawk an hmachhawn leh ang a, an chak a nih chuan playoff khel turin an tan kawng pakhat a la inhawng tihna a ni, bawhpelh loh ngei an tum ang.