Hamilton chhangtu Verstappen

Tun hnai khan Lewis Hamilton chuan Red Bull chu car nei chak uchuak tiin a sawi a, car intlansiakna sang ber chu tun hma zawng zawng aiin an thunun tih a sawi bawk - champion lai Max Verstappen ngaihdan erawh a ni ve lo.

Red Bull driver Verstappen hian tun hnai kum hnih chu a zawnin F1 title a la. Tun season kal laia intlansiak pathumah Red Bull driver pahnihin hnehna an inchan sem, team dang tan hmun an kian ve miah lo tihna a ni.

Mercedes driver Hamilton chuan, "Ka car hmuh tawh zawng zawngah tunlai a Red Bull car hi a la chak ber," a ti. Hei thu hi Verstappen tan chuan lem a nuam vak lo ang, mimal theihna ai chuan car chak vanga champion niah a puh niin a ngaih theih.

Dutch tlangval Verstappen chuan, "Tun hma lam statistics en let ila, a thusawi kha a dik lo tih kan hre thei. Car chak tak chu kan nei ngei mai, dan phal ang thlap a nih chuan a pawina engmah a awm lo," tiin Hamilton a chhang.

Hamilton hian kum 2014-2020 inkar khan Mercedes car khalh chungin F1 title vawi ruk ngawt a lo la tawh. A vanglai khan midang tan hmun a kian miah lo a, champion hnem ber Michael Schumacher (7 titles) pawh a nih rual hial.

British tlangval hian Schumacher khumin record a siam chho mai dawn niin a lang hman. Mahse, Red Bull leh Verstappen an rawn tlazep a, tunah chuan Mercedes leh Lewis te dinhmun hi a ṭha ta lo hle.

Hamilton hi kum 38 mi a ni tawh a, car intlansiakna huangah hian hun tam a nei tawh lo. Mimal taka a record siam tur rawn dansaktu hi British tlangval tan chuan a hnawksak viauin a rinawm, ropui zawk nih inchuha inelna hmuhnawm an chhawp chhuak zel dawn.

Tun season intlansiak pathumna atan April 30, Pathianni hian Baku City Circuit-ah Azerbaijan Grand Prix an tlan leh ang.