Real vs Chelsea - Result chu in rin lawk ang a ni e!

BBC chief football writer Phil McNulty chuan Chelsea leh Liverpool-te goal khung loa an inhnehtawk khan, "Real Madrid lakah Chelsea tan tuin nge goal khung ang?" tih zawhna a pe a, Chelsea-in goal khung tur an nei loah a ngai.

Kar khat a liam hmain British sports journalist lar hi a chhanna pek a ni a, chu chu, "Tumah," tih a ni - Chelsea player zingah Real laka goal khung thei an awm lo a, Nilaini zan khan Champions League quarterfinal first leg-ah 2-0 in an tlawm.

Real tan Karim Benzema leh Marco Asensio ten goal khat ve ve an khung a, hun tawp thlenga Chelsea-in a chhanletna tur an neih loh avangin an tlawm - Graham Potter an ban hnuah Frank Lampard hoin match hnih an khel ta a, an tlawm ve ve.

Blues hian match hnihah hian goal thum an chhuah a, goal an khung ve lo. Inelna hrang hrangah match li zet a zawnin goal an khung ta lo a, Chelsea tan khua a var thei lo.

Beiseina thamral

Santiago Bernabeu-a team pahnih intawn hmain Sky Sports chuan Chelsea neitu Todd Boehly an kawm a, Blues-a neitu zinga a tel hnua coach pahnih, Thomas Tuchel leh Potter ban tawhtu hian an chak a beisei thu a sawi.

American sumdawng hausa chuan, "Kan hmalam hun êng tak thlirin kan phur takzet a, Real lakah pawh hian 3-0 a chak kan beisei," a ti a, mahse, he interview hi football kalphung leh awmzia a man lohzia hrilhfiahna mai a ni.

Minute 21-na lekah Benzema kan hmu nghal a, Dani Carvajal-a ball 'chip' luh ṭha zet chu Vinicius Junior-a'n goal-ah pet mah se Kepa Arrizabalaga chuan a lo dang per - a per lehlam hi Benzema chuan hnai tak aṭangin goal-ah a chantir.

French striker tan Champions League-a goal 90 a khungna chiah a ni a, European football-a club inelna sang berah hian Cristiano Ronaldo (140 goals), Lionel Messi (129) leh Robert Lewandowski (91) te chu goal khung tam lama a tluk loh awmchhun an ni.

A pawi zo ta

Real-in goal khung hma mah se goal dang erawh an nei thei lawk bik lo - second half minute 59-naah Chelsea tana contract ziak thar hlim Ben Chilwell chu hnawhchhuah zui a ni a, Chelsea dinhmun chhe sa a chhiat belh!

Chilwell hian keeper Kepa chiah hmachhawn tawh Rodrygo chu a kuai thlu a, red card pek nghal a ni - referee thutlukna a dik a, Chelsea tan he thil thleng hi a pawi thung.

Minute 74-naah Real-in player tam zawk an nih an chhawr zui a, Vinicius chuan Asensio tan ṭha taka siamsakin, bench aṭanga luhtir forward hian Real goal hnihna ni turin goal-ah a chantir.

Chelsea-in hun tawp thlengin a chhanletna tur an nei tawh lo a, Santiago Bernabeu-ah Real an chak - April 18 zanah second leg khelh leh tur a ni a, Stamford Bridge-ah tlang turin Chelsea tan thilmak thlentir a ṭul ang.

Lawmna tur

Rin lawk ang ngeiin Real khelmualah Chelsea an tlawm a, chutihrual chuan London club ṭantute tan lawmna tur erawh a awm tho - Wolverhampton Wanderers laka an tlawm ṭum aiin Chelsea tlarhma an hriam sawt a, awmzia an nei zawk.

Atletico Madrid aṭanga loan-a an hawh Joao Felix-a'n a theihna pholangin, goal khungna chance pawh a nei a, mahse, a vanneih zan a ni lo - a hmaah Thibaut Courtois a ding tlat.

Raheem Sterling chuan Blues tan si phurh sutna remchang a nei bawk a, mahse, English forward pawh hian Courtois bawk a paltlang thei lo. Mason Mount pawhin khungna remchang a nei a, mahse, Blues tana a khelhpui ṭhin Antonio Rudiger chuan a dang hman.

Chelsea tana pawi ber erawh Chilwell hnawhchhuah a ni chu a ni. English fullback a chhuah hnuah, tlarhnung awl hnawhphui tura defender luhtir a ngai a, a tuartu chu tlarhmaa Felix a ni. Mahse, Blues-in goal an chhuah belh ta tho a, N'Golo Kante lo kir lehin Chelsea ti ṭha sawt mah se result erawh a ngai a ni - an tlawm.