Khawvel player ṭha 100 zingah LZ-a

Mizo forward Lallianzuala Chhangte chu tun hnaia tihchhuah, EA Sports FIFA 23 Community Team of The Season a thlan theih zingah a tel a, Indian player zinga nominee ni thei hmasa ber a ni.

FIFA 23 Community Team of The Season-ah hian khawvel ram hrang hrang aṭanga season hmang ṭha, footballer 100 hming chhawpchhuah a ni a, heta ṭang hian a ṭha zual 11 chu thlanchhuah leh tur a ni ang.

ISL Golden Ball dawngtu Lianzuala pawh hi player ṭha zual 11 zinga tel tura thlanchhuah theih zingah dah tel a ni a, surl.li/gipel ah lutin, Mizo tlangval hi a duh tan vote theih a ni.

Mumbai City forward Lianzuala hi attacker huangah dah niin, ani bakah hian Arsenal striker Gabriel Jesus, Benfica tana season duhawm tak hmangtu Goncalo Ramos, Marseille forward Alexis Sánchez, Atletico Madrid striker Álvaro Morata, Real Madrid forward Rodrygo leh Ajax chhuanvawr Dusan Tadic te chu attacker zinga chhawpchhuah, hming langsar zual an ni.

Lianzuala hi FIFA 23's Team of the Week-ah January thlatir khan a lo lang tawh bawk a, Indian player zingah FIFA 23's Team of the Week-a lang thei pathumna a ni a, a hma hian Akash Mishra leh Bipin Singh an lo lang tawh - golden card hmu awmchhun a la ni thung.

Lunglei tlangval Lianzuala hian season a hmang ṭha hle - season kal mekah inelna hrang hranga match 30 khelin goal 18 a khung a, assist vawi kua a nei bawk. Durand Cup-ah match sarih khela goal sarih khungin, assist vawi thum a nei a, top scorer a ni.

ISL-ah pawh match 20 khelin goal 10 a khung a, assist vawi ruk a nei - minute 165 dana goal khung ziah ang a ni a, Sunil Chhetri hnua Indian player zinga a pahnihna ni turin ISL hero of the league-ah thlan a ni.

India tana vawi 19 inlana goal li khungtu Lianzuala hian Mumbai City tan Hero Super Cup a khel mek a, an match hmasa berah Churchill Brothers chu 2-1 a hnehin, chakna goal a khung - Inrinni zanah NorthEast United an hmachhawn leh ang.

Lianzuala chuan, "Ka beisei phak loh a ni a, ngaihsak pawh ka lo ngaihsak lem lo. Mahse, han lan ve takah chuan a lawmawm duh hle a, ṭan lehzual duhna pawh min pe nasa. League sang zawkte nen phei chuan khaikhin rual a ni lo a, mahse, ka tan chuan a ropui khawp mai," tiin Vanglaini a hrilh.

Lunglei tlangval chuan sawi zawmin, "Footballer chu inhliam palh chuan comeback a harsa ṭhin a, vawi leh khata career chhe vek thei kan ni - hei vang hian ṭawngṭaipui ka mamawh reng a, min ṭawngṭaipui reng turin Mizo mipui ka ngen a ni," a ti a, i ṭawngṭaipuina LZ-a'n a ngen.