Messi Enkawltu, Cruyff-a ṭhianpa, Dutch Football Legend Neeskens Aizawlah kan hmu dawn - Lalnghinghlova Hmar (Tetea Hmar), MFA Honorary Secretary

Mi tam takin Netherlands midfielder ropui bera an chhal, Johan Cruyff-a kawppui ṭhin, Lionel Messi leh Ronaldinho-te pawh lo enkawl tawhtu - Dutch pa ropui Johan Neeskens a lo zin dâwn.

He pa, Ajax leh Barcelona star ropui ni ṭhin hian April 17-21, 2023 chhungin Mizo football coach-te training a pe dawn a ni.

Mizoram Football Association chuan MFA Golden Jubilee Project pakhat atan Netherlands Football Association (KNVB) hnuaia World Coaches chu Aizawlah an buatsaih dawn. Mizoram leilung rap tur zingah Neeskens aia footballer ropui hi an awm lo ang tia sawi ngam tur mi hrâng a ni.

European champion (Champions League tluk pui) vawi thum a ni thei a, World Cup-ah Netherlands chu ṭum hnih final a luhpui. 1974 World Cup-ah phei chuan midfielder ni chungin goal nga ngawt a thun a, FIFA World Cup Silver Boot a dawng - a ropui asin.

Total Football

1970's chhoa Ajax-a khel phak tur chuan football thiam bîk nih a ngai - 1971-73 chhung European champion an ni zawn thei tlat.

He team hian a hunlaia an la hmelhriat loh 'total football' an khel a, football khelh dan hmel hmang thlaktu anga ngaih an ni - he Ajax tana star ropui ber chu Cruyff a ni lo thei lo a, a thlawptu erawh rawlthar Neeskens a ni.

FIFA Coach of the Century-a an thlan zui tâk Rinus Michels chuan rawlthar Neeskens hi hmù fuhin Ajax-ah a lalut a, right back ni ṭhin kha midfielder ropuiah a chher chhuak.

Michels-a hoin 1974 World Cup an khel a, Netherlands kha champion tura rin kai ni mah se final-ah a thlengtu West Germany chu 1-2 in an hneh lo - mikhual team hian final-ah goal thun hmasain a thuntu chu Mizorama rawn zin tur hi a ni!

Coach ropui Michels hi Barcelona lamah a pêm a, Cruyff leh Neeskens pawhin Nou Camp an pan a, Ajax lama a hlawhtlin angin hlawhtling zui lo mah se La Liga leh Copa del Rey champion a ni zui leh thei - Barca fans ngainat a hlawh takzet a ni.

1978 World Cup a khel leh a, an ram hi final luhpui leh tho mah se a thlengtu ram bawk an tum a, extra time-ah Argentina lakah an tlawm.World Cup champion teuh takin ṭum hnih a awm a, a vanduai a ni.

Messi Enkawltu!

Khawvelah Lionel Messi enkawltu ni tura vannei hi an tam lo, a vannei zingah Neeskens hi a tel.

Neeskens hian Messi a enkawl a ni mai lo a, Barcelona assistant manager a nih chhungin Ronaldinho, Samuel Eto'o, Xavi, Iniesta-te a enkawl hman a, Frank Rijkaard-a hnuaiah khan assistant manager a ni ṭhin.

Neeskens chuan, "Messi kha chu training-na aṭangin a danglam bîk tih hmuh hmaih theih a ni lo a, small sided games kan khelhte khan a thiam zia kan hmù thei," tiin tun hnua Messi a lar chho hi mak a tih loh thu a sawi.

Neeskens hi 1998 World Cup-ah khan Netherlands assistant manager a ni a, Guus Hiddink-a hnuaiah awmin Dutch legend tia chhal ngam ṭhiau Edwin vàn der Sar, Jaap Stam, De Boer unau, Clarence Seedorf, Edgar Davids, Patrick Kluivert, Dennis Bergkamp etc a lo enkawl tawh ṭhin a ni.

Football-a tawn hriat ngah em em mai - football khawvela coach ropui ber pawl Michels-a hnuaia inzir; football khawvela thiam ber ber Messi, Ronaldinho, Bergkamp, Xavi, Iniesta etc te bula tal hrep tawh kan mikhual dawn a ni.

Kar khat chhung WorldCoaches programme hi an nei dâwn a, theory leh practical-in football coaching a zirtir ang. KNVB hian coach pahnih dang an rawn tir dâwn bawk a ni. He course hi Netherlands FA (KNVB) hnuaia kalpui tur a ni a, course chhimtute an vannei dâwn - mahni ramah 'foreign degree' an la thei dâwn a ni!

Football khawvela mi ropui huanga tel phak, Ballon d'Or Dream Team an thlan pathum zinga lang phak ni bawk hi 'chhangban' lo pe leh tur awm se a ṭha ang!