AC Milan an chak hmasa phawt

Champions League nomawi chawi tawh an nihna AC Milan lamin an lantir, team ṭha lo zawk niin lang mah se Milan hian an tlarhnung an veng tluan thei a, an mikhual Napoli chu Ismael Bennacer-a goal hmangin 1-0 in an hneh.

Inelna erawh a la zo lo - April 18, Thawhlehni zanlai hian Stadio Diego Armando Maradona-ah an la inkhel leh dawn, team pahnih inthlauhna hi goal khat chauh a la nih avangin semifinal lut tur a la chiang lo.

A hmuhnawm

AC Milan hi Champions League title vawi sarih la tawh an ni a, tawnhriat an nei ṭha - chutih rualin tuna an player zingah erawh Milan ropui laia khel hman an awm lo, team thar an ni thung.

Napoli tan erawh Champions League nomawi sawi tur a la awm lo, quarterfinal an thleng ringawt pawh hi an club tan mellung pawimawh a ni phak - club sulhnu en chuan team pahnih an inthlau hle.

Mahse, tun season atan chuan Luciano Spalletti naute hi team ṭha zawk an ni. San Siro-ah pawh a tir aṭangin boruak an nei nghal, hnai zet aṭangin Georgia winger Khvicha Kvaratskhelia chuan remchang nei mah se goal line-ah an lo dansak.

Italian club pahnih inkhel ni mah se attacking game kan hmu, team pahnihin goal khung an tum ruh hle. Chawlhlawk hma deuhin Braham Diaz thawhrah sengin Bennacer chuan inkhela goal awmchhun a khung.

Tun season UCL bika goal khung hnem ber Napoli hian na takin an nawr let reng, mahse defender tawnhriat nei Simon Kjaer hoa ding Milan tlarhnung an chesual duh tlat lo - Denmark defender hian an goal hnihna a tauh lut teuh hle.

Napoli lamin beisei an neih laiin Andre-Frank Zambo Anguissa chu minute 74-naah yellow card vawi hnih hmuh vangin hnawhchhuah a ni a, hun tawp lamah player tlem zawk niin goal an chhuah belh lo erawh an vannei.

Osimhen lo kir dawn

Milan khelmualah goal an khung thei lo a, an hun ṭha tam tak an hlah. Inkhelh banah Napoli coach Luciano Spalletti chuan second leg an khelh hunah chuan a striker chhuanvawr Victor Osimhen a chhawr thei dawn tih a sawi.

Tun season Serie A goal 21 khungtu Osimhen hi Nigeria tana a fehchhuahna lamah a inhliam a, training nei tawh mah se dim a la ngaih avangin Milan lakah an la chhawr ngam lo.

Spalletti chuan, "Milan kan mikhual hunah chuan Victor Osimhen a khel thei ang tih hi 100%-in a sawi ngam. Tun ang inelna sanga player ṭha chhawr theih loh chu a nghawng a na, chutihrualin khelmuala lut ka naute zingah dem tur an awm lo," a ti.

Kum 24 mi Victor Osimhen hian tun season Champions League match nga a khelh aṭangin goal li a khung tawh, ani hi a inlan thei a nih chuan Milan tlarhnung tan pawh hna a hautak leh zual dawn tih a chiang.

Pioli a lawm

Inkhelh ṭan hmain Milan coach Stefano Pioli chuan Napoli hneh tur chuan fans puihna an mamawh tih a sawi a, a beisei ang ngeiin San Siro chhung boruak a nung hle a, an khelh dan leh boruak siamtu fans chungah a lawm hle.

Milan coach Pioli chuan, "A nihna tak sawi chuan inkhel bul an ṭan fuh zawk, minute 10 pawh a liam hma khan goal khung theihna remchang vawi hnih an nei hman, mahse kan inveng thei kha a lawmawm hle.

"Napoli hi team inbuktawk tak an ni a, englaiah pawh an hauhawm vek. Tunah hian inkhel a la tawp lo tih kan hria, chuvangin minute 90 khel leh turin kan inbuatsaih nghal a ngai dawn a ni," tiin a sawi.

Milan hian Napoli lakah Serie A nomawi an hloh dawn - Champions League aṭang erawhin Milan hian Naples club hi petchhuah an tum thung ang, a tlang zawkin Inter Milan leh Benfica inkhela chak zawk an tum leh dawn a ni.