CAM Cup champion RVL

Cricket Association of Mizoram (CAM) hnuaia multi-day format a inelna sang CAM Cup hmasa ber khelh zawh a ni a, final-ah Ramhlun Venglai chuan Kulikawn chu wicket thuma hnehin an champion.

Suaka Cricket Ground-ah Thawhṭanni khan final khelh ṭan a ni a, RVL hian hnehna chang turin Nilaini khan an second innings-ah run 96 siam an mamawh. Over 28 chhungin wicket 7 hlohin an run mamawh zat an siam thei.

Kulikawn lamin vuak thlang zawkin first innings-ah beisei angin an che ṭha tawk lo, run 103 siamin an out zo. An second innings-ah erawh Parvez Ahmed che ṭhain run 103 a siam a, run 216 an vaw chhuak.

Man of the match-a thlan Kulikawn bowler Bobby Zothansanga a che ṭha a, RVL innings vawi hnih chhungin wicket 14 a la. Mahse, RVL chak tur hi veng thei bik lovin 1st Division champion lai hian an first innings-ah run 224 an siam a. Ahmaa Ralte chuan run 82 siamin a team tana siam hnem ber a ni.

Tournament chhunga half century vawi khat siama wicket 12 la bawk Ramhlun Venglai all-rounder Vanrotlinga chu Man of the Series a thlan a ni a. Kulikawn batsman Parvez Ahmed leh bowler Bobby Zothansanga ten Best Batsman leh Best Bowler chawimawina an dawng.

CAM Cup hi 1st Division tournament a a sang pali - Ramhlun Venglai CC, Zarkawt Lords CC, Kulikawn CC leh Gorkha CC ten an khel a ni.