Liverpool-in Bellingham an la dawn lo

Premier League team talbuai ve tak Liverpool chuan Borussia Dortmund midfielder Jude Bellingham lalut tur anga sawi thawm awm mah se an lalut dawn lo a, Reds hian Bellingham lakluhna tura sum sen tam ngai lutuk chu an zuam lo nia sawi a ni.

Kum 19 mi midfielder hian nipui transfer-ah Dortmund hi a chhuahsan tur anga sawi thawm a awm a, Liverpool-in an duh bakah amah hi Reds ṭantu a nih avangin Anfield-a a pem mai rinna a lian hle.

Mahse, England international hi a man atan a tlem berah pound maktaduai 100 tal sen a ngai dawn a, nipui transfer-a inthuam thar tum tak Liverpool tan player mala heti zat sum sen hi a harsa dawn tih a lang.

Jurgen Klopp chuan nipuiah Liverpool chu an intuaithar tur thu a sawi tawh a, Bellingham chu vantlang hriatah ualau takin a lo fak tawh bawk.

Klopp chuan, "A thiamna leh hmasawn a mamawhna ka thlir hian, a thil thiam ang hi zir harsa tak niin ka hmu a, hmasawn a mamawhna lah awlsam taka a thiam mai theih tur a ni bawk si.

"Player ṭha tak a ni a, Dortmund-a a hming a chher aṭang hian ka rilruah hi chuan a awm reng sa tawh a ni," a ti a, English midfielder hi a dah sang hle.

Bellingham hian kum 2020 khan Birmingham City aṭangin Dortmund hi a zawm a, inelna hrang hrangah match 37 khela goal 10 khungin, assist vawi ruk a nei a ni.

Khawthlang media-ten an tarlan dan chuan Liverpool hian Bellingham hi la duh reng mah se, an sum neih dan leh nipuia an hmalak dan tur thlirin, English mdidfielder lam hawi rih loh mai hi an rel a ni.

Liverpool hian nipui transfer-ah a thlawnin player an chân nual dawn a, Jurgen Klopp-a'n chelh duh mah se forward Roberto Firmino chuan contract pawhsei loh a thlang a, midfielder pathum James Milner, Naby Keita leh Alex Oxlade-Chamberlain te chu nipuia contract hmang zo tur an ni bawk.

Klopp chuan international break neih a nih lai khan Liverpool neitu Fenway Sports Group te nen nipuia squad thuam chak dan tur an sawi ho thu a sawi a, âtthlak taka sum sen hluai erawh an tum lem lo niin a lang.

Pathianni zana Arsenal nen 2-2 a an inhnehtawk hma khan Klopp chuan an ruahmanna sawiin, "Nakkumah eng thil pawh ti ila, mipui emaw, nangni media ho tan pawh a tawk zo ngai dawn lo.

"Mahse, fimkhur taka player lakluh belh chungin hma kan sawn ngei ang tih ka ring a, chu chu tuna kan ruahmanna chu a ni e," a ti a, tun season-a lawm khat tak Liverpool fan-ten nipui transfer an nghakhlel tawh khawp ang.