Captain 'cool' Dhoni-a'n Chennai a chhan thei lo

Indian Premier League a hmuhnawm zel a, team inthlauhna a tlem ṭhin hle. Nilaini zan khan Rajasthan Royals chuan MA Chidambaram Stadium, Chepauk-ah mualneitu Chennai Super Kings chu run thumin an hneh. CSK hi chak lo mah se kum 41 mi captain MS Dhoni a che ropui hle.

Ṭhumvawra vannei Chennai-in vawm hmasak an thlang. Rajasthan Royals tan Jos Buttler (52*), Devdutt Padikkal (38), Shimron Hetmyer (30*) leh Ravichandran Ashwin (30) te an che ṭha a, 175/8 runs an siam.

Chennai tan Devon Conway (50) leh Ajinkya Rahane (31) te che ṭha mah se Shivam Dube (8), Moeen Ali (7) leh Ambati Rayudu (1) ten an thlawp ṭha lo. Chutihrualin tawnhriat nei ṭha bik Ravindra Jadeja (25) leh MS Dhoni (32) te hmangin a tawp thlengin chak beiseina an nei.

Over thum a la awmin CSK hian chak turin 54 runs siam a la ngai a, over 18-naah Dhoni-a'n six leh four a vuak zarah 14 runs an siam. Chak turin ball 12 lekah 40 runs a la ngai tho.

Over 19-naah Royals bowler Jason Holder lakah Jadeja-a'n six vawi hnih leh four vawi khat a rawn vua a, 19 runs siamin over tawp berah chak turin 21 runs siam a ngai.

Royals bowler Sandeep Sharma-a'n ball hmasa pahnihah wide vawi hnih a rawn vawm nghal a, Dhoni-a'n six vawi hnih a vuak leh bawk avangin Chennai tan chak turin ball thumah run sarih chiah siam a ngai.

Ball hnuhnung pathumah Sandeep Sharma a insiamṭha a, ball khat zelah run khat zel pein Rajasthan Royals a chakpui. Dhoni leh Jadeja te erawh che ropui viau mah se a tawp an thleng zo lo a, an tawpna chu 172/6 niin run thum chauhin Royals an pha lo a ni.