ISL club ngamtu Sreenidi Deccan

Hero Super Cup chu Kerala-ah khelh mek a ni a, Nilaini zan khan I League club Sreenidi Deccan chuan ISL leh khawtual club Kerala Blasters chu 2-0 in an hneh. Group A inkhel dangah Bengaluru FC chuan RoundGlass Punjab chu 2-0 in an hneh ve bawk.

Kumin Super Cup-ah hian ISL club 11 leh I League club panga te chu group paliah pali zela ṭhen darh an ni a, group tin aṭangin pakhat chauhin semifinal an lut dawn.

Mizo tlangval Ramhlun-chhunga leh Vanlalbiaa Chhangte te telna Sreenidi Deccan hian an match hmasa berah Bengaluru FC an chelh tawh a, Kerala Blasters an hneh zui avangin semifinal lut turin an dinhmun a ṭha.

Sreenidi Deccan hian match hnuhnung berah I League champion RoundGlass Punjab an hmachhawn dawn a, anmahni ang bawka point li hmu Bengaluru FC-in Kerala Blasters an hmachhawn ang. Tun dinhmunah Sreenidi leh Bengaluru hi head to head-a an inan bakah goal difference, an goal khung zat leh an goal zat thlengin a inang vek.

Hero Super Cup hi Sony Ten 2-ah a en theih a, zanin dar 8:00 hian Mizo tamna Jamshedpur leh Mohun Bagan te an inkhel dawn a, tlai dar 5:00-ah Gokulam Kerala leh FC Goa te an inkhel bawk ang.