Barca-ah Messi a lo kir ka beisei - Lewy

Barcelona striker Robert Lewandowski chuan season tharah Lionel Messi nen khelh dun a châk tih a sawi a, Argentina captain chu Nou Camp lamah a kir leh ngei a beisei thu a sawi bawk.

Kum 35 mi Messi hian 2021 khan Barcelona chhuahsanin Paris Saint Germain a pan, kha tih hunlai khan Catalan club hian a hlawh pek tur chungchangah harsatna an nei, a hlawh hi a chanvea tihhniam inhuam mah se an tlin chuang lo.

Paris club tan hian season hnih daih contract a ziak a, contract hi kumin June thlaa zo tur a ni leh der tawh. PSG nen an inrem danah season khat dang atana pawhsei theih tih a ni.

PSG chuan Messi hi chelh an duh a, tuna a hlawh ang zat pangngai hlawh chhunzawm turin hun rei zawk atan contract ziahpui an duh, nikum kum tawp lam khan a thuphungin inrem tawh mah se thuin engmah an la ziak fel lo.

Messi-a'n PSG hmalak tum dan a ngaichang a, a hma hun a chiang lo mek. PSG lamin thlun beh an duh a, sum tam uchuak tak hlawh turin Saudi Arabia lam aṭanga sawmna a dawn bakah a club hlui Barcelona chuan laklet an duh bawk.

A kum a tam ve deuh tawh a, chutihrualin European football inelna sang erawh khelh a la duh. Media ṭhenkhat tarlan dan chuan, a rei lo berah Copa America 2024 thleng tal chu football inelna sang hi khelh ngei a la tum.

Tun hnai an match hnuhnung pahnihah Barcelona fans chu 'Messi, Messi' tiin an au rual a, an legend hi jersey number 10 ha ṭhin a ni, inkhelh laia minute 10-naah Messi an ngaih thu an auchhuah pui ṭhin a ni.

Lewandowski chuan, "Messi hi Barcelona ta a ni a, inzawmna thuk tak nei an ni. A lo kir leh a nih chuan thil lawmawm chungchuang bik a ni ngei ang. Barcelona-ah hian a tan hmun a awm reng.

"Nipui bazarah hian eng nge lo thleng dawn chu ka hre lo, mah se season tharah chuan Leo nen hian kan khelh dun theih ngei ka beisei," tiin Messi nena khel dun tura a inpeih thu a sawi.

Xavi enkawl Barcelona hian Europen football lamah beisei an phak rih lo. Season tharah chuan Champions League lama hlawhtlin hi an thupui pawimawh tur niin a lang.

La Liga-ah erawh Real Madrid lak aṭangin nomawi an chhuhsak ngei dawn niin a lang, khelh hmabak match 10 an la neihah point 13 zetin hma an hruai fal mek.