Euro 2032 thlen diltu Italy

Italy rama football thuneitu sang Italian Football Federation (FIGC) chuan 2032 European Championship thlen an duh a, football inelna lian thlen dilna hi Europe football thuneitu sang UEFA hnenah an thehlut tawh tih an sawi.

FIGC tarlan dan chuan Euro 2032 hi an thleng thei a nih chuan, an khawpui hrang hrang - Milan, Turin, Verona, Genoa, Bologna, Florence, Rome, Naples, Bari leh Cagliari-ah te khelh a ni ang.

FIGC president Gabriele Gravina chuan, "Tun aṭanga kum 10 a nih leh chuan European football hi sang leh zual takah a awm tawh dawn, chumi hunah chuan football hmangaihtu Italy ramah Euro khelh theih ni se a duhawm khawp mai," a ti.

A tirah chuan Italy hian Euro 2028 emaw World Cup 2030 emaw thlen an duh a, dil tum pawhin thui tak hmalakna pawh kalpui a ni hman. Mahse, nikum aṭang khan 2032 European Championship thlen tum hian thapui an thawh ta zawk.

Turkey pawhin 2028 emaw 2032 Euro emaw thlen tumin dilna an tehlut ve bawk, a zawna vawi ruk an dilna a ni. Britain leh Ireland te pawhin Euro 2028 thlen dilna hi an lo thehlut tawh bawk a ni.

UEFA chuan dilna an dawnte hi ngun taka an ngaihtuah tur thu an sawi a, kumin October thla hian Executive Committee chuan vote hmangin 2028 leh 2032 Euro thleng tur hi an thlang fel ang.