Marquez la intlansiak thei dawn lo

A kut hliam vangin Marc Marquez chu a la intlansiak ve thei dawn rih lo. Tun kar tawpa Austin-a an tlan tur Grand Prix of the Americas-ah Spanish rider hi a hmel kan la hmu thei dawn lo tihna a ni.

Thla hmasa khan tun season MotoGP tlan ṭan a ni a, inelna hmasa ber atan Portuguese Grand Prix tlan a ni a, he intlansiakah hian Marquez hi a chesual - a kut dinglam zai a ngai hial.

Repsol Honda chuan an rider chungchang sawiin, "Marquez chu enkawl mek a la ni a, a rang thei ang bera bike intlansiakna sang ber a hmachhawn leh thuai theih kan beisei," tiin enkawl lai a la nih thu an sawi.

Marquez tan Grand Prix of the Americas tlan loh hi chânna lian tak a ni dawn. Circuit of the Americas-ah hian kum 2013-18 chhung khan a zawnin vawi ruk hnehna a chang thei a, kum 2021 khan a chak bawk.

Hliamin season hnih chhung Marquez hi a tibuai a, kuminah dam takin lo kir mah se a hliam leh nghal. Portugal GP-a Miguel Oliveira a sut palh vang hian hremna a hmachhawn a ngai dawn bawk - MotoGP chuan hremna an kaltlangpui tur thu an tichiang tawh.