Wawrinka tlak laiin Zverev a chak
Alexander Zverev chuan clay court chu a inkhelh thiamna hmun a ni tih a takin a lan tir zel. German tlangval hian Monte Carlo Masters-ah third round a inhlangkai a, player langsar dang Stan Wawrinka erawh a zinkawng a tawp thung.
Seeded 13-na Zverev hian Roberto Bautista Agut chu 6-4, 6-4 in a hneh. Set khatnaah hian 3-2 a hma a hruai laiin a khungpui service a chhuhsak a, set hnuhnung zawkah pawh game nganaah bawk service chhuhsak lehin hnehna a chang a ni.
Season hmasa French Open semifinal-ah khan Zverev hi a inhliam, champion zui ta Rafael Nadal nen an inkhelh laiin a ke rêk a hliam a, tennis court aṭangin wheelchair hmanga lak chhuah a ngai hial.
Tun hnaiah tennis a khel ṭha pangngai leh tawh, clay court bikah erawh Roland Garros 2022 hnuah Monte Carlo Masters hi a khelh leh hmasak ber a ni a, a tan chuan a thlen chin hi chanchin lawmawm a ni.
Zverev hmabaka ding tur hi Russian player Medvedev a ni dawn. Russian tlangval hian Lorenzo Sonego chu 6-3, 6-2 in a lo hneh ve thung, tun season kal laiah nomawi pali ngawt a chawi tawh avangin inrintawkna a nei sang hle.
US Open champion hlui Medvedev chuan, "A nihna takah sawi chuan clay court-ah hi chuan hnehna han chang ve ṭhin mah ila harsa ka ti ṭhin. Tun ṭumah pawh khan ka chak hram chauh," a ti.
Inkhel dangah season hmasa French Open finalist Casper Ruud a chak. Ruud hian Botic van de Zandschulp 7-5, 7-6(1) in a hneh. Dutch player hian Paris khawpuia clay court inelna lian atan inbuatsaihna a nei ṭha hle.
Ruud hian a match lehpekah chuan Jan-Lennard a tum dawn. Seeded 14-na Jan-Lennard hian inkhel dangah Alex de Minaur 6-3, 6-2 in a hneh a, Karen Khachanov pawhin 7-6(2), 6-2 in Ilya Ivashka a hneh.
Grand Slam vawi thum champion tawh Stan Wawrinka erawhin beisei nei sang ve leh deuh mah se, a khingpui seeded pariatna Taylor Fritz lakah 7-6(10), 6-2 in a chak lo thung.
World number 1 Novak Djokovic chuan last 16 a lut tawh a, seeded pakhatna ni bawk Novak hian nizan khan Lorenzo Musetti hmachhawnin result erawh kan hre hman lo a ni.