Premier League inum boruak a nung; Arsenal leh Manchester City inlan dawn
Thlasik a zo tak tak tawh a, ruah tlain khua rawn ti dai ve leh zuai mah se, ni a sat leh chinah erawh boruak a lum ta halh halh hle. Premier League hmahruaitu Arsenal chu bukin an awm mek, nipui boruakin a nuai chhunzawm dawn.
Zanin dar 10:00 hian Manchester City chuan Leicester City an mikhual dawn. Citizens hian hnehna an chang a nih chuan Gunners nena an inkar point thum chauh a ni ang, match khatin an la khel tlem dawn - North London club inkhel tur boruak an lo siamsak lawk thei.
Mikel Arteta naute chuan Pathianni zan dar 6:30-ah West Ham United nen 'London Derby' an khel dawn thung. Hammers hi an chet ṭhat lai a ni hran lo, mahse an player neih dan chhut chuan Arsenal tan hna a hautak dawn tih a sawi ngam.
Arsenal hian Premier League bak khelh tur an nei tawh lo, chuvangin an tan chuan tun season-a an khelh hmabak zawng zawng hi 'Final' vek a ni tawh. City erawhin Champions League leh FA Cup an la hmabak tel bawk.
Arsenal kutah
Premier League khelh hmabak pariat an la nei - Arsenal forward Bukayo Saka chuan an champion leh champion loh chu an kuta innghat a nih thu a sawi, a sawi dik. An khelh hmabakah hian an chak vek a nih chuan midang result ngaichang loin nomawi an chawi ang.
Mahse, chak vek hi thil awlsam a ni dawn lo. Man City khel turin Etihad Stadium an la pan dawn, chumi hnuah Chelsea mikhualin Newcastle United an lenchilh zui leh bawk ang - chak vek chu thil theih ni mah se a hautak dawn hle.
England international Saka chuan, "Engkim hi kan kuta innghat a ni tih kan hria, chuvangin kan hmabak match pariat la awmah hian a mal te tein hnehna chan chhoh kan tum ang, thui tak sawi lawk theih erawh a ni lo.
"Season rei tak kan hmang tawh a, kha leh chen kha ṭha leh ngelnghet takin kan khel tawh, chuvangin beiseina chu kan nei tur a ni. A hmawr bawk fuh tur erawh chuan kan hmabak pariat hi a pawimawh zual dawn hle a ni," tiin a sawi.
Arsenal hi an match hnuhnung berah Liverpool nen an inhnehtawk, goal hnih an khung hmasak an hum thei lo. Reds lamin thih thaa an beih hnuah Arteta naute an talbuai a nih kha, inelna boruak sang leh hautak buai lo turin Arteta-a'n a naute a fuih ṭhat a ngai dawn hle.
Hammers lakah Gunners hian record an nei ṭha, league match bika an intawn hnuhnung vawi 29 aṭangin ṭum 22 an chak a, vawi nga an inhnehtawk - chak loh vawi hnih chiah an nei - Liverpool laka an talbuaina insiamṭhatna hun a ni thei ang.
Pep a phur
Inelna boruak a sang tial tial a, a boruak a san zawh poh leh Manchester City manager Pep Guardiola chuan nuam a tih thu a sawi. Barcelona leh Bayern Munich manager hlui hian nomawi inchuh boruak a hmachhawn hnem tawh, a tan thil thar a ni lo.
Guardiola chuan, "September, October leh November ai kha chuan tunah hian nuam ka ti zawk. Tunah chuan nomawi inchuhin kan inkhel a, hetiang boruak hi nuam ka tih zawng tak a ni," tiin Champions League an khelh boruakah a sawi - EPL a huphurh lohzia a lantir bawk.
Man City hian Champions League semifinal an lut tluk a ni tawh, FA Cup-ah semifinal an thleng tawh bawk. Premier League-ah pawh hian an khelh hmabakah an chak vek chuan an champion dawn - Arsenal an la hmachhawn dawn a, point chhuhsakna remchang a ni ang.
Citizens tan zanina an mikhual tur Leicester City hi an huphurhawm hran lo ang, an intawn hnuhnung paliah an chak fai vek. Foxes hian season thara Premier League khelh zel an tum a nih chuan point khat tal hmuh an tum a ngai, chu erawh thil awlsam a ni dawn lo.
Pep-a'n a squad a siksawi kual ṭhin a, khelmuala lut apiangin an tih tur chu an hre bel em em zel. Erling Haaland milin team a rem mek a, zaninah pawh Norway international striker hi Foxes tlarhnung tana buaipui ngai ber a ni leh ang.
Man City hi chak tura rinkai an ni, chutih rualin Leicester City hi tlak hlau, thih thaa bei tur an nih avangin zuam sual theih an ni ve tho. James Maddison, Jamie Vardy leh Harvey Barnes te hi an khelh fuh ni chuan team lian tana buaipui tham an ni.