AFC Standing Committee Member-ah Lalnghinglova Hmar

Asia khawmualpuia football thuneitu sang ber, Asian Football Confederation chuan Standing Committee zinga pakhat, AFC Social Responsibility Committee Member atan Lalnghinglova Hmar (Tetea Hmar) an ruat.

Mizoram Football Association honorary secretary Tetea Hmar chuan, "AFC lam chu kan ngaihtuah phak loh a nia, an Committee lamah kan lang ve tur hi a lawmawm khawp mai.

"Heng hi MFA lama ka thawhpuite zar ka zo a ni a, zavaia thawh rah a ni. Thawhpuiten a hahthlak leh harsa an thawk a, AIFF lamin kan hnathawh an hmù a, min lo pawm ve a ni ber mai e," tiin a thawhpuite zara hlawhtlinna chang a nih thu a sawi.

AFC general secretary Datuk Seri Windsor John chuan April 13 khan Tetea Hmar ruatna lehkha hi AIFF hnenah a thawn. AFC-ah hian ram 47 an awm a, heng ram hrang hrangte hian an aiawh ruat an duh ve vek. Ram tinin an aiawh tur an nominate a, AIFF-in India aiawh turin Tetea Hmar hming leh CV an thehlut ve bawk. Asia rama football thuneitu sang ber hian uluk taka an zirchian hnuah Mizoram football hmel thlak danglamtu Tetea Hmar hi an telh a ni.

Tunah hian Tetea Hmar hi AIFF Executive Committee meeting neiin New Delhi lamah a cham mek a, AIFF hnuaia sub committee pawimawh League Committee-ah Chairman hna a chelh mek bawk.