Nipuiah Chelsea an inṭhuahfai dawn

Premier League club talbuai ve tak Chelsea chuan nipui transfer-ah player chhuahtir nual an tum niin khawthlang media-te chuan an tarlang a, chhuak tura sawi zingah Mason Mount chu hming langsar a ni.

Kum 24 mi Mount hian tun season-ah Blues tan hmun a chang tam tawk lo a, inelna hrang hrangah match 33 khel tawha goal thum khungin assist vawi ruk a nei - heng zinga vawi sarih chu bench aṭanga luhtir a ni a, vawi 16 chu khel tluan loin lakchhuah a ni bawk.

Mount hi Liverpool nen sawizawm mek an ni a, 2024-ah a contract a tawp tawh dawn avangin a man a to lo ang - hetihlai hian media ṭhenkhat chuan a cham dawn niin an ziak bawk a, Blues-in coach atana Luis Enrique leh Julian Nagelsmann an bia chuan a tiphur niin an sawi.

Hetihlai hian Conor Gallagher pawh Liverpool-in an duh nia sawi a ni a, English midfielder hi Newcastle United pawhin an hnim hnai viau.

Chhuak tura sawi zingah, kum 27 mi Ruben Loftus-Cheek hian 2024 thleng contract a nei mek a, a ṭul dan a zira pawhsei theih a ni bawk. Mahse, Blues lam hian English midfielder hi chhuahtir mai an pawi ti lo zawk.

Forward pahnih Pierre-Emerick Aubameyang leh Hakim Ziyech pawh chhuak tur anga sawi an ni. Thomas Tuchel-a lakluh Auba hian Tuchel ban a nih hnuah hmun a chang phak lo zui a, kum 33 mi striker hian Major League Soccer lam aṭangin rimtu a nei niin an sawi.

Ziyech hian January transfer-ah khan Paris Saint-Germain a zawm hman ṭep a, mahse, lehkha tihfel ngai an tihfel hman loh avangin French club hi a zawm leh ta lo - nipuiah chuan pem tawh ngei tura ngaih a ni.

US fapa rangkachak Christian Pulisic pawh Chelsea-ah a tla tlum tawk lo a, Captain America hming lem an pek hian nipuiah chhuah a duh mai a rinawm - duhtu an awm nual ang.

Croatian midfielder ṭha Mateo Kovacic chuan June 30, 2024-ah a contract a hmang zo tawh dawn bawk a, Blues tan tun nipuiah an hralh dawn lo a nih chuan contract thar ziahpui a hun tawh.

Hetihlai hian Chelsea-in chelh an duh, tun nipuia contract hmang zo tur N’Golo Kante chuan contract thar a la ziak duh rih lo a, London club hian Champions League an khelh a rinawm loh avangin Kante hi chhuak thei dinhmunah a ding - Inter Milan-a loan-a khel mek Romelu Lukaku dinhmun a la chiang lo bawk.

Todd Boehly leh a thawhpuiten Chelsea an lei hnuah player lakluh nan sum an seng nasa a, player 17-ah pound maktaduai 600 vel an the thang tawh - coach ban tak Graham Potter pawhin a duh aia tam player thar pek a nih thu a lo sawi tawh.

Blues hian 2021-22 financial year-ah £121.3mtd an hloh a, tun nipuiah chuan bazar vak an tum tawh lo nia sawi a ni - hetihrual hian an sum hloh hi Chelsea neitu hmasa Roman Abramovich hrem a nih vang leh, club hralh tura loh theih loha siam a nih vang a nih thu an sawi.

Chelsea hian zanin dar 7:30-ah league match khel turin Brighton & Hove Albion an mikhual dawn a, league match thum a zawna goal khung tawh lo Chelsea tan chak a pawimawh.