Man Utd 2-2 Sevilla : Goal li hi United player khung vek!

Manchester United-in Sevilla lakah bul an ṭan ṭha a, Marcel Sabitzer hmangin hma takah khung mah se a tawp an khar ṭha lo. Lisandro Martinez inhliam vangin player 10-in an khel a, Tyrell Malacia leh Harry Maguire ten an lamah an tihluh avangin 2-2 in inkhel a tawp.

Europa League quarterfinal first leg hi Ningani zan khan Old Trafford-ah khelh a ni a, second leg hi Ramón Sánchez Pizjuan-ah April 20, Ningani zan hian khelh a ni dawn. Erik ten Hag-a hote hi inkhelh hmain chak tura rinkai zawk ni mah se tunah erawh an dinhmun a ṭha ta bik lo.

Sabitzer Show

Man United-in bul an ṭan ṭha, ṭan phatah Jadon Sancho-a'n goal a khung nghal. Amaherawhchu English winger Sancho khung hi offside vangin pawm a ni lo.

Mualneitu hian na takin an nawr a, Antony-a ball pet ṭha chu Moroccan keeper Yassine Bounou-a'n a dansak. Minute 14-naah United-in Sevilla tlarhnung an su hawng a, Bruno Fernandes-a ball pek chu Sabitzer-a'n ṭha taka a lak hnuah chiang zetin goal-ah a pet lut.

Sevilla an insiamṭha lo a, an chetsualna ngaiah bawk an chesual. Anthony Martial-a ball pek tawih chu Sabitzer-a'n um lutin keeper Bono chauh a hmachhawn hnuah minute 21-naah goal hnihna a khung.

Chance ṭha hlah

Man United an che ṭha chhunzawm a, mual sir aṭangin Antony a hlauhawm ṭhin hle. Captain Bruno Fernandes bakah Casemiro ten an hun neih an hmang ṭangkai lo.

Sevilla erawhin first half tawp lamah chance an insiam ve chauh a, David de Gea-a'n a hna a tlin. Mahse, inhliam vangin Raphael Varane chu second half-ah a inlan tawh lo.

Chutihrualin second half-ah pawh United bawk an chungnung a, Antony-a'n a ball pet hmasak goal-ah a pet lo a, a vawi hnihnain goal ban per mah se goal-ah a lut chuang lo.

Sabitzer-a'n box chhungah Wout Weghorst a pe a, Dutch forward hian a bul lawka awm Anthony Elanga hmu fuh loin Tyrell Malacia zawk a pe. Malacia ball pet hi Sevilla player-ten an dang hman.

Own Goal

Man United-in inkhel an thunun a, Ten Hag-a ngaih a ṭha. Second half ṭantirha Varane aia Maguire a luhtir bakah Christian Eriksen, Wout Weghorst, Anthony Elanga leh Facundo Pellistri te an lut leh bawk.

Minute 81-naah Ten Hag-a'n substitution a hmang zo a, minute thum hnuah Sevilla ball vawrh luh satliah chu Malacia-a'n a dang fuh lo. Mual sira awm Jesus Navas cross chu Malacia chuan dang perin goal-ah a lut, minute 84-naah 2-1 a ni.

United buaina belhchhah turin hliam vangin Lisandro Martinez a khel zui thei tawh lo a, Ten Hag-a'n substitution a siam zawh tawh avangin player 10-a an khelh a ngaih phah. Moroccan striker zuang sang Youssef En-Nesyri a ball tauh hmasa zawk chu De Gea-a'n a dansak a, hun pek belh minute hnihnaah En-Nesyri-a ball tauh chuan Maguire-a hmai perin goal-ah a lut.

Hun tam zawk inkhel thununtu Man United kha hun tawp dawnah meuh chuan chak lo thei dinhmunah an ding hman a, hun a tlem tawh zarah an ṭangtluan thei hram.

Engtin zel?

Man United-in hliam vangin Martinez leh Varane an chan a, France international defender erawh fimkhur vanga thlakah ngaih ni mah se Argentine defender erawh a hliam na.

Ten Hag-a hote hi hliam vangin an buai mek. Sevilla an hmachhawn ṭum hian Marcus Rashford, Luke Shaw leh Alejandro Garnacho te chu hliam vangin an chhawr thei lo.

Spain an tlawh hunah hrem vangin Bruno Fernandes a khel thei dawn lo a, khualmualah an la hneh ngai loh club an hmachhawn dawn avangin hmabak a harsa dawn.

April 16, Pathianni zan dar 9:00 hian Man United-in Nottingham Forest an tlawh dawn a, Premier League-a palina china awm an duh chuan point hloh a thiang tawh lo. Chutihrualin Casemiro-a'n hremna a hmang zo a, Ten Hag-a hoten relegation zone-a awm Forest lakah point thum an beisei thei ang.