Last 16-ah Djokovic a chak lo

Novak Djokovic chu Lorenzo Musetti hneh loin Monte Carlo Masters last 16 aṭangin a tla, world number 1 bakah hian Alexander Zverev pawh a zinkawng a tawp ve bawk.

Ningani zan inkhelah Djokovic hian set hmasa ber chu a la, mahse ruah surin an inkhel hi a tibuai - darkar khat chuang an chawlh lailawk a ngai, a tawpah chuan 4-6, 7-5, 6-4 in Musetti a chak a ni.

Seeded 16-na Musetti tan tennis a khelh hun chhunga world number 1 a hneh vawi khatna a ni a, a tan chuan hnehna ropui ber ang hiala sawi theih a ni, a match lehpekah chuan Hubert Hurkacz hnehtu Jannik Sinner nen an inkhel leh ang.

Musetti chuan, "Ruah sur vanga chawlh a ngai a, kan inkhel rei ngar ngar khawp mai. Harsatna hrang hrang ka tawk ve a, a tawpa dingchang zawk nih chu a nuam hle, ka tan chuan duhthusam a ni," a ti.

Chak lo mah se Djokovic tan pawh lawmna tur a awm. Indian Wells leh Miami Open a khelh theih loh hnuah inelna a hmachhawn ve leh chauh a ni, a tan chuan a ṭhat dan bera khelh chhuah leh nghal a harsa.

Grand Slam vawi 22 champion tawh Djokovic chuan, "Ka chak loh avangin hrehawm ka ti hle. Ka service a ṭha tawk lo tlat kha insiamṭhat a ngai, a lawmawm lai erawh tournament ka khel thei kha a ni," a ti.

Serbian star hian Monte Carlo hmain tun season match 17 a khelh aṭangin a service vawi 17 chauh a hloh. World number 21 Musetti lakah erawh match khatah a sevice ṭum riat ngawt a hloh.

Inkhel dangah Miami Open champion Daniil Medvedev chuan match point vawi hnih a inchhanhim hnuah, a khingpui Alexander Zverev chu 3-6, 7-5, 7-6 (9-7) in a hneh hram a ni - a awlsam lo takzet.

German tlangval Zverev hian set hnihna leh set hnuhnung berah 5-4 a hma hruaiin a service ve ve, mahse tie break a khelhpui hnuah pawh a chak tlang zo ta chiang lo, a vanneih ṭum a ni lo. Medvedev-a'n Holger Rune a tum leh ang.

A zawna vawi hnih champion tawh Stefanos Tsitsipas-a'n harsatna lian a la tawk lo. Greek tlangval hian seeded pawh ni phak lo Chilean tlangval Nicolas Jarry chu 6-3, 6-4 a hnehin quarterfinal a lut.

Seeded palina Casper Ruud erawh Jan-Lennard Struff lakah 6-1, 7-6 (8-6) in a chak lo. Struff hi world number 100 daih a ni a, tun inelna hmachhawn tur hian qualifying kaltlanga invaw tling a ni.