Liverpool-in Bellingham an lalut dawn lo

Tun hnai lawkah Liverpool nena rei tak sawi zawm tawh Jude Bellingham chu Reds-in an lei loh tur thu an tichiang a, coach Jurgen Klopp chuan, "Naupangin âtthlak taka Ferrari a ngen ang chauh a ni," tiin an tan Bellingham lei ngaihna a awm loh thu a sawi ve leh ta.

Borussia Dortmund midfielder Bellingham hi pound maktaduai 100 chuang man tura ngaih a ni a, nipui transfer-a inthuam thar tum Liverpool tan a man hi a sang hret. Klopp chuan, "Player paruk, £100mtd man ṭhiau nipuiah kan nei thei lo ang.

"Naupang â kan ni lo -kum nga mi naupang hnenah Krismas atana thilpek a duh zawt ta la, "Ferrari," tiin chhang che se la, "Iva thlang thiam ve," in ti miah lo ang. Chu ai chuan, "Ni lo e, Ferrari chu a to lutuk, bakah i khalh thiam chuang hleinem," tin in chhang ngei ang.

"Chu naupang chuan chu chu hrethiam lo ta se, nun hahthlak tak a ni ang. Enge i phak tawk i en ang a, chumi mil chuan i che mai tur a ni. Kan duh leh mamawh te nei turin theihtawp kan chhuah fo ṭhin a, mahse, a chang chuan duh viau mah ila, kan nei thei lo, tih hi pawm thiam a ngai a, kan phak tawkah lungawi zir mai a ṭul ṭhin," a ti.

Kum 19 mi, Reds ṭantu anga sawi Bellingham hi Liverpool tan a khel dawn ta lo - Merseyside club ṭantute tan rimawi a ni lo ang tih a chiang a, chutihrual chuan Liverpool-in nipuia player lakluh tam an tum vang a ni pakhat a, hnual viauna tur niin a lang lo.

Liverpool hian Thawhṭanni zan dar 12:30-ah league match an khel dawn a, Leeds United an lenchilh ang. Klopp chuan Elland Road-a inkhel turah hian hun rei tak hliam vanga chawl tawh Luis Diaz chu a lo kir tur thu a sawi.

Premier League table-ah Liverpool hi pariatna ni mekin, an league match hnuhnung pangaah vawi khat chiah an chak a, season thara Champions League khel lo thei dinhmunah an ding mek.

Klopp chuan, "Leeds hian an theihtawp an chhuah dawn a, boruak pawh a danglam leh khawp ang - keini chuan Arsenal laka kan khelh ṭhat chhunzawm a ṭul a, chu chu tih kan tum ang.

"Engmah hloh tur kan nei chuang lo a, thil thar tih kan tum ang. Inkhelh ka châk tawh - Leeds hian an theihna zawng zawng an hlan dawn a, a awlsam lo ang," tiin a sawi.

Klopp chuan Arsenal nen an inkhelh ṭuma thil thleng, assistant referee Constantine Hatzidakis-a'n Liverpool left-back Andy Robertson a nghawk chungchang a sawi zui a, Football Association-in Hatzidakis an hrem zui loh chungchangah lungawi lohna a sawi lo a, "A nih tur ang thlapin thil an kalpui niin ka hria," a ti.

Hetihlai hian Manchester City laka 4-1 a an tlawm ṭuma player-te chet dan avangin Reds hi £37,500 (Rs. 38,28,883) chawitir an ni a, City midfielder Rodri chu Cody Gakpo laka a chet dan avangin a yellow card pahnihna a hmu turah Liverpool player-te chuan an ngai a, referee Simon Hooper chu Reds player engemawzatin an din hual a ni.