Hero Super Cup-ah Aizawl FC beiseina a tawp

Hero Super Cup-ah Aizawl FC tan champion beiseina a tawp. Ningani zan khan Mizo club hian ISL club Odisha chu 3-0 in an hneh lo a, group khat aṭangin team khat chauhin semifinal an khelh dawn avangin Victor Lalbiakmawia hote tan knockout luh beiseina a awm tawh lo.

Manjeri Payyanad Stadium-a inkhelah Aizawl FC-in player an thlan dan aṭanga thlirin goal venhim an tum tih a lang a, hun chanve hmalam an tum a hlawhtling. ISL club-in first half-ah goal an khung lo a, Mizo club hian goal khung theihna hun ṭha an nei - HK Lalhruaitluanga'n corner aṭanga ball kal a sut hman loh bakah Ivan Veras-a'n box chhungah ball a pet ṭhelh.

Odisha hi team ṭha zawk an ni a, Mizo player pali Jerry Mawihmingthanga, Isak Vanlalruatfela, Paul Ramfangzauva leh Lalthuammawia Ralte ten bul an ṭan. Isak hian ṭum thum ngawt goal khung theihna remchang a nei a, AFC keeper Vanlalhriatpuia'n a dansak.

Second half-ah team ṭha zawk danglamna a lang. Second half-ah Diego Mauricio, Victor Rodriguez leh Nandha Kumar Sekar ten Odisha tan goal khat ṭheuh an khung a, keeper Vanlalhriatpuia'n hun tawp hma hretin Diego Mauricio penatly pet a dansak.

Inkhel dangah Hyderabad leh East Bengal te an inhnehtawk a, ISL club pathumin semifinal luh an la inbeisei vek. Hyderabad leh Odisha ten point li ve ve an hmu a, match hnuhnung bera an inkhela chak zawkin semifinal an lut dawn. Chak zawk an awm lo a nih erawh chuan East Bengal tan beiseina a inhawng dawn a, Aizawl FC an hneh chuan semifinal an lut ang.