La Liga - Barca an fal; boruak a dai?
European football-a league ngaihven hlawh pawl La Liga-ah point 13 ngawtin Barcelona an sang fal mek a, league match sawm chauh khelh tur a awm tawh bawk - hei vang hian La Liga boruak a dai deuh em aw, tih tur a ni.
La Liga an match hnuhnung bera Villarreal ngam lotu Real Madrid chuan zanin dar 12:30 hian Cadiz an lenchilh dawn a, champion beisei turin thilmak thlen ngai tawh mah se, tlawm erawh mualphona a ni tih an hrethiam ang.
Barcelona chuan Pathianni zan dar 7:45-ah Getafe an lenchilh dawn a, pahnihnaah tal season khar tum Atletico Madrid chuan Pathianni zan dar 10:00-ah Almeria an mikhual dawn bawk - Atletico hian point hnih chauhin Real an thlau mek a, Diego Simeone naute hian an hmelma kumhlun chunga season khar an châk dawn.
Indahṭhat hun?
Real hian Nilaini zan khan Champions League quarterfinal match hautak khelin, mikhual Chelsea chu 2-0 in an hneh a, Thawhlehni zan dar 12:30 hian London club nena second leg khel turin Stamford Bridge an pan leh ang.
Carlo Ancelotti naute hian Copa del Rey final lut tawhin, Champions League nomawi an la beisei bawk a, beisei tlem tawhna league lama hah rimtawng taka inhman ai chuan King Carlo-a'n inhahdamtir a, player khel khat deuh khelhtir a thlang mai thei.
Chuti a nih chuan a chhawr rim zual Eder Militao, Karim Benzema, Toni Kroos, Luka Modric leh Federico Valverde te a hahdamtir a rinawm a, Lucas Vazquez, Antonio Rudiger, Marco Asensio, Aurelien Tchouameni, Nacho leh Dani Ceballos te ho tan kawng a inhawng ve leh thung ang.
A thiang lo
Real tan indahṭhat a finthlak mai thei a, Spanish Super cup champion Barca tan erawh inelna dangah beisei tur a awm tawh loh avangin, a ṭha thei ang bera Getafe lenchilh tum mai chu thutlukna finthlak a niin a rinawm.
Catalan club hian an league match hnuhnung berah Girona chu 0-0 in an inhnehtawkpui ringawt a, point hloh a thiang tawh lo - Barca hian, "Nomawi chawi turin league match 10 a la ngai e," tiin website lamah an tarlang a, an phur tawh hle.
Xavi hote hian league match 10 aṭang hian match rukah hnehna an chan chuan an champion dawn a, an kal tluan chuan May thlaah an champion hman dawn tihna a ni - mahse, an kalkawngah hian Atletico Madrid, Real Betis leh Real Sociedad te ho an la awm ve tih hriat a ṭha.