Quartararo hi ka elpui a ni - Bagnaia

MotoGP champion lai Francesco Bagnaia chuan tun season kal laia a elpui ber chu Fabio Quartararo a nih thu a sawi a, rider dang tan chuan thu ngaihthlak nuam tak chu a ni lo mai thei.

Quartararo hi kum 2021 MotoGP champion a ni a, nikum khan champion tura rinkai ni leh hman mah se a tawpah a zuih - intlansiak hnuhnung berah Bagnaia chuan a title a chhuhsak.

Ducati rider Bagnaia chuan, "A hma pawhin ka sawi tawh, tun season atana ka elpui ber chu Fabio Quartararo a ni, ani nen hian tun hnaiah inelna hautak kan nei, kuminah pawh thawnthu a danglam tam lo ang.

"Rider ṭha tak tak Marc Marquez, Enea Bastianini, Jorge Martin, Marco Bezzecchi leh Luca Marini te pawh an awm, anni pawh hi ngaihthah chi erawh an ni chuang lo," a ti.

Tun season kal laiah Bagnaia hian point 41 hmuin, rider championship table-ah pahnihna a ni mek, a chungah hian point 50 hmutu Marco Bezzecchi a awm. Quartararo hian point 18 hmuin 10-naah a awm thung.

Pathianni zan dar 12:30 hian tun season chhunga intlansiak pathumna atan Grand Prix of the Americas an tlan leh ang.