Mane leh Sane ten ngaihdam an dil

Bayern Munich-in Champions League quarterfinal first leg-ah Manchester City 3-0 in an hneh lo a, inkhelh banah Sadio Mane chuan Leroy Sane chungah kut a thlak. Bavarians club chuan Mane chungah hremna lekkawhin zanin dar 7:00-a Hoffenheim an mikhual hunah a khel thei lo ang.

Kut tuartu Sane chuan rilru puitling tak pu chungin club hruaitute chungah Mane hremna tinem turin a ngensak a, hei hian team boruak pawh a tihṭhat phah hle. Germany media-te tarlan danin player pahnih hian team chungah ngaihdam an dil ve ve a, club training pawh an zawm leh ve ve tawh bawk.

Mane leh Sane buaina te hi chinfel vek a la ni lo a, Bayern-in Senegalese forwrd chunga hremna an lekkawh hi an la belhchhahin a rinawm. Sane hian club thuneitute chungah Mane hi ban lo turin ngen mah se nipui transfer-ah Liverpool forward hlui hi Allianz Arena chhuahsan thei dinhmunah a ding.

Tun dinhmunah erawh manager Thomas Tuchel-a'n player-te chu thil thleng theihnghilh a, Hoffenheim leh Manchester City an hmachhawn tur atana insawrbing turin a duh.

Bayern hi Bundesliga hmahruaitu ni mah se an hnuaia awm Borussia Dortmund aiin point hnih chauhin an hmu tam a, league nomawi chawi turin chetsual a thiang tawh lo.