China ramah hmeichhe tennis khel leh dawn

Hmeichhe tennis thuneitu sang Women's Tennis Association (WTA) chuan kumin aṭangin China ramah inelna an nei leh dawn tawh tih an sawi, an thil phut erawh a la hlawhtling chuang lo.

Doubles huanga world number 1 hlui Peng Shuai chuan, kum 2021 November thla khan China vice-premier Zhang Gaoli lakah mipat hmeichhiatna lama tih luihna a tawrh thu a lo sawi chhuak tawh.

A hnu lawkah Peng hian social media kaltlangin a thu sawi chu dawt leh thu belhchian dawl lo a nih thu a sawi leh nghal. Mahse, a thu sawi hnuah Peng hi chin hriat lohin tun thlengin a bo zui nghal a ni.

China chuan Peng hi a dinhmun a ṭhat thu an sawi ṭhin. WTA hian Peng chunga thil thleng chu langtlang taka kalpui an duh a, amaherawhchu tun thlengin a chin hriat a la ni lo thung.

WTA chief executive Steve Simon chuan, "Thla 16 chhung chu tuna kan hmalak dan hi kan kalpui tawh, kan duh chu a hlawhtling dawn rih lo niin a lang. Chuvangin ar talh dan chi dang kan ngaihtuah a ngai," tiin a sawi.

China rama tennis an khelh leh dawn takah chuan, season tawp a thiam zual pariat inelna WTA Finals pawh Shenzhen-ah an khel thei leh tawh dawn tihna a ni.