PSG tana khelh zel tum Mbappe

Kylian Mbappe chuan season thara a khelhna tur club a sawi chiang a, a hun hman mekna Paris Saint Germain chhuahsan tumna a nei rih lo - Paris club tan chuan chanchin lawmawm a ni ang.

A hma hun changchang zawhna chhangin Mbappe chuan, "Season thar chu Paris Saint Germain tan ka khel chhunzawm ang, he hmunah hian contract nei lai ka ni a, chuvangin chhuahna tur chhan a awm lo," a ti.

Nipui bazar hmasa khan Mbappe hi Real Madrid nen an inhnaih hman hle - Spanish club hi a zawm ngei dawn nia a lan hnuah PSG tan contract a ziak leh ta zawk a, kum 2025 thleng daih contract a nei mek.

Kum 24 mi Mbappe hian PSG tan contract nei mah se a hma hun hian sawi a hlawh fo. PSG tan Ligue 1, French Cup leh League Cup a chawi kim tawh, a hmabak chu Champions League a ni.

Champions League champion tur chuan atan Real Madrid pan a fuh a rinawm, hei vang hian La Liga champion lai nena an sawi zawm fo pawh hi thil mak a ni hran lo, engtik niah erawh chuan a la kal pawhin a rinawm.

UCL chungchang sawiin Mbappe chuan, "Last 16, quarterfinal, semifinal leh final pawh ka thleng tawh, champion chu thil chakawm tak a ni. Ka thil tum pawh a ni, engtik niah emaw chuan a lo la thleng ang," a ti.

Mbappe hi kum naupangte ni chungin France captain a ni der tawh, an ram hi FIFA World Cup a chawi pui tawh a, Qatar World Cup neih zawk takah khan pahnihna a nih pui bawk.

France khawpui Paris hian Olympic 2024 an thleng dawn, anmahni ramah Olympic khelh theihna remchang a awm dawn tihna a ni. Mbappe chuan, "Tun hma pawhin ka lo sawi tawh, Olympic khelh hi chu ka châk zawng tak a ni.

"Hun a la tam avangin eng nge lo thleng dawn kan la hre lo, theih ni se chuan inlan ve ngei ka chak," a ti. Olympic football hi kum 23 hnuai lam inelna a ni a, mahse senior player pathum tel an phalsak ṭhin. Ligue 1 hmahruaitu PSG hian zanin dar 12:30 hian an hnuai chiaha awm RC Lens an hmachhawn dawn a, an hneh loh a nih chuan an inthlauhna hi point thum chauh a ni tawh ang. An intawn hmasak ṭumah Lens hi 3-1 in an chak a, PSG tan point hloh theihna a ni.