Thawk harsat Szczesny khel tluan lo

Juventus goalkeeper Wojciech Szczesny chu Sporting Lisbon nen an inkhelh laiin a thawk a buai a, inkhel chhunzawm thei loin chawlhlawk hman hmain thlak a ngai hial.

Ningani zan Europa League quarterfinal first leg-ah Szczesny hi a thawk a buai a, Old Lady damdawi lamthiam ten an endik hnuah Mattia Perin chuan a rawn thlak - Perin hian Allianz Stadium-ah goal a chhuah lo. Juve hi 1-0 in an chak.

Poland international Szczesny chuan, "Tun hmain hetiang hi ka la tawng ngai lo, ka awm a tawt a, thawk a rawn harsat kha chuan ka hlauthawng hle," a ti, mittui nen khelmual a chhuahsan a ni.

Szczesny vangin Juve an lungngai a, hun tawp dawn lama Federico Gatti goal hmangin Sporting an hneh a, an tan chanchin lawmawm a ni - Portuguese mualah Europa League quarterfinal second leg an la khel leh ang.

Juve tana thu lawmawm pakhat chu Paul Pogba a inkhel thei leh tawh. France international hi hun tawp dawnah mualah a rawn lut. Pathianni zana Sassuolo nen Serie A an khelh hunah chuan hun rei zawk a inlan tawh a rinawm.

Italian club dang AS Roma erawh an che fuh lo. Jose Mourinho enkawl Roma hi Feyenoord khelmualah 1-0 in an tlawm, goal awmchhun hi Matts Wieffer khung a ni - mikhual teeam lamin a chhan letna an nei lo.

Europa Conference League champion Roma hian Roma khawpuiah Dutch club hi an la mikhual ve leh dawn a, tlang tur zawk sawi theih a la ni lo, chumi hmain Pathianni zan dar 12:15 hian Udinese nen Serie A an khel leh phawt dawn a ni.