Netherlands legend Neeskens-a'n Mizoramah hna a ṭan

FIFA World Cup 1974 All-Star Team-a tel phak, International Olympic Committee-in 1971/72 season-a European Footballer of the Season atana a thlan Johan Neeskens chuan Mizoram leilung a rap ta a, nimin aṭang khan Mizo coach-te football coaching zirtir hna a ṭan nghal.

Football thiam vanga hriat hlawh Netherlands rama football thuneitu sang ber Netherlands Football Federation (KNVB) leh Mizoram Football Association buatsaih, WorldCoaches programme-ah Neeskens hi Chief Instructor niin a rawn kal a, ani bakah hian WorldCoaches director Johan van Geijn leh Berend Zuurman pawh an lo kal.

India aṭangin anni ṭawiawm tur hian Acosa Sports Infrastructure Services director Deepak Khanolkar leh life skills coach Kimberly Miranda te pawh an lo kal bawk a ni.

MFA Golden Jubilee lawmna chi khat atana neih World Coaches programme-ah hian Mizo coach 28 chu zir turin an inziak lut a, April 21 thleng awh tur programme niin, Lammualah practical-a zirna neih ṭhin niin, class pangngai lak ṭhin a ni dawn bawk.

Total football

Neeskens hi kum 1970 chhoa Netherlands team ropuia player pawimawh ni phak a ni a, hetihlaia Dutch football team-in an larpui 'total football' tihlawhtlingtu zingah a tel - he team ropui leh an system sawi a nih apiangin Johan Cruyff hming lamrik hmasak ṭhin a ni a, a dawta Neeskens hming ziah a nih loh chuan a famkim ṭhin lo.

Kum 71 mi ni tawh coach chuan, "Total football ang khel tur kha chuan thil tam tak tih a ngai a, hun a duh rei bawk. Netherlands mai pawh ni lo, Ajax pawhin kha system kha kan chhawr em em a, mahse, a awlsam lo.

"Kan coach zirtir turte tan theihtawp kan chhuah dawn a, chutihrual chuan engkim inhrilh a, inzirtir vek tur chuan kan hun neihin min daih dawn lo a ni," tiin Vanglaini a hrilh a, kar khat chhunga thil zawng zawng zir theih a nih loh thu a sawi.

Neeskens hi Netherlands tan vawi 49 inlanin goal 17 a khung a, assist vawi nga a nei. World Cup 1974 leh 78-ah final lut mah se an chak zo lo a, Euro 1976-ah pathumna an ni bawk - WC 1974 final-ah hian penalty aṭangin goal hmahruai a khung a, minute 2-naa a goal khung hi tun thlengin World Cup final-a goal lut rang ber a la ni reng.

Thawhhona ṭha

Johan Cruyff kha piano tum thiam tak ni ta se, mawi taka chu rimawi a rik chhuah theih nana piano kensaktu chu Neeskens hi a ni ngei ang - Ajax tan a khelh lai a zawna vawi thum European Cup champion ni thei Neeskens hian hlawhtling tur chuan thawhhona ṭha a pawimawh ber thu a sawi.

Barcelona assistant coach hlui Neeskens chuan, "Lionel Messi te, Ronaldinho te kha chu ball pet dan tur hrilh an ngai lo a, a kalphung sawifiah pawh a ngai lo - anni chuan engkim hi an thiamsa emaw tih mai tur a ni. Chuvang chuan anni ho enkawl leh, tuna kan hmalakna hi chu a danglam tih ka hria a, insiamrem pawh a ṭul.

"Football-a hlawhtling tur chuan thawhhona ṭha a pawimawh ber. Team kan nih angin kan thawk ho ang a, hlawhtling turin kan bei ho ang," a ti a, mimal anga hmingṭhat hlawh tum chu a buaithlak thu a sawi.

Neeskens chuan, "Football hi chu engtiklai pawhin a inthlak danglam reng a, keimahni pawh inzir belh zel a ṭul," a ti a, kum 1970 chhoa an hlawhtlinpui system ṭhenkhat chu tun thlenga rin chi a nih loh thu Vanglaini a hrilh.

Nangmah kha!

Neeskens hian a vanglaiin khawvela coach ropui bera tam takin an ngaih, Barcelona, Ajax leh Netherlands coach hlui Rinus Michels leh Romanian-Hungarian coach ropui Stefan Kovacs te hnuaiah a khel hman a, inkhelh a chawlhsan hnua coaching a luhchilh hnuah pawh a thawhpui hraw ṭhin hle.

World Cup 1998-ah khan Guus Hiddink-a sawmna ngai pawimawhin Frank Rijkaard leh Ronald Koeman te nen Dutch team-ah assistant hna an thawk ho a, Rijkaard-a hnuaiah hian Barcelona leh Galatasaray-ah assistant coach hna a thawk tawh a, Hiddink-a'n Australia a enkawl khan a thawhpui bawk.

Neeskens chuan, "Coach thawhpui nuam tak tak vek an ni a, Rijkaard-te kha player a nih lai pawha thiam tak a nih tel avangin ka chung en a ni. Mahse, tumah hi an ka tum ngai lo - tumah hi nih va tum suh u, in nihna angin bei ula, nangmah kha i tawk a ni," a ti.

Ballon d'Or Dream Team pathumnaa tel phak Neeskens hi Pele-a'n March 2004-a footballer la dam lai zinga ropui zual a thlan chhuah, FIFA 100-ah pawh khan a lang phak a ni.

World coaches chu

Neeskens hian, "Hmanah kha chuan coaching pawh hi a awlsam zawk. Tunah chuan kil tinah press an awm tawh a, pressure a sang em em tawh zel," a ti a, club enkawl loa WorldCoaches programme-a inhman a, zinchhuah chu nuam a tih thu a sawi.

WorldCoaches programme hi KNVB hnuaia awm niin, kum 1997 aṭanga ṭanin coach 16,500 vel zet training an pe tawh a, naupang 550,000 vel inkhelh an zirtir tawh bawk - an sulhnu hi a ropui hle.

KNVB official Johan van Geijn chuan, "Football hi game a ni satliah lo a, kan nun hruaitu a ni. MFA nen kan indawr tirh khan Mizoram hming hi ka la hre ngai lo - in ram ka rawn thleng a, hetiang tlangramah engtinnge football khelhna hmun in neih theih zawk, ka ti hial. MFA chungah lawmthu ka sawi a ni," a ti a, coach-te chu midang zirtirtu ni thei tura inchher tum turin a hrilh bawk.

MFA honorary secretary Lalnghinglova Hmar chuan, "Kan beisei phak loh programme ṭha kan hnuk lut thei a, coach-te pawhin theihtawp chhuah ula ka duh a, a tawp thleng turin kan beisei che u a ni," a ti a, Berend Zuurman chuan, "Indian football-ah chuan Mizoram leh Manipur hming lam tel zel a ngai," tiin Mizoram hmasawnna a fak ve bawk.