Chelsea hmabak a hautak - an hmaah Real!
Graham Potter an ban hnuah pawh Chelsea-in result ṭha an nei hleithei lo a, club legend Frank Lampard hoa match thum an khelh tawhah an la tlawm vek - an match hmasa berah Wolverhampton Wanderers chu 1-0 in an ngam lo a, Real Madrid lakah 2-0 in an tlawm zui a, Inrinni zan khan Stamford Bridge-ah Brighton & Hove Albion chu 2-1 in an ngam lo leh bawk.
Chelsea hian zanin dar 12:30-ah Champions League quarterfinal second leg an khel leh dawn a, an mikhual tur hi first leg-a an ngam loh hnu Real Madrid an ni - a tlem berah si hnih fai tala chak a ṭul a, Wolves leh Brighton laka tlawm Blues tan beisei tihsan ngam a harsa hle.
Lampard chuan, "He club-ah hian ni kua chu hna ka thawk leh ta a, ka thil hmuh hian min tilawm lo a ni - engti kawng zawng mahin sawi mawi theih a ni lo. Chelsea tana i inkhel a nih chuan i thinlungah inchhuanna a awm tur a ni a, Thawhlehni zanah chak kan tum chuan hei aia nasaa kan thawh a ngai," tiin Brighton an hneh loh zawhah khan a lo sawi tawh.
A manganthlak
UK chanchinbu lar The Telegraph tana sports ziaktu Luke Edwards chuan Chelsea lakah a beisei a bo thu a sawi a, "Mi nuih tizatu mai an ni a, fiamthu tam tak kara a nuihzatthlak ber an ni zel," a ti a, Chelsea a dim lo hle.
Luke Edwards chuan, "Manager pakhat, ni kaw chhunga match thuma tlawm an kawl. He hna a thawk leh thei hi a vannei takzet a, coach a nih hnua Lampard record ropui lohzia hi sawi lan a ngai a ni - mahse, a thiam loh erawh a ni lo. Club talbuai tak kha thenfai tumin a luhchilh a, midang kih hnawk then a tum a ni. Tunah hian ruahmanna mumal nei miah loa pound maktaduai 600 sengtu club chanchin kan sawi a ni," a ti!
Chelsea tana chanchin lawmawm erawh Real nen an intawn hmasaka inhliam Kalidou Koulibaly tih loh player dang zingah hliam thar lam an awm rih lo a, Chelsea hian harsatna nei loin Real an mikhual thei dawn.
A ṭawng lam
Chelsea harsatna ber hi sawithiam a har - goal khung an harsat a, an tlarhnung a phui chuang lo a, midfield-in hna an thawk ṭha tawk lo bawk. A tawi zawng chuan, engkim thlak danglam a ngai - tunah chuan a harsa rih takzet.
Lampard chuan, "Inrintawkna nei let tura kan tih theih ber chu a tam thei ang bera infuih a ni tawp a, training aiin a ṭul rih zawk. Kan hah em avangin training hi chu kan nuai liam deuh rih mai a, a mal mala player-te titipui a ngai a ni," a ti a, training erawh an neih reng tho thu a sawi bawk.
English coach ngaihdan hi a tawi zawnga sawi chuan, taksa leh thiamna lam ai chuan, an buaina chu rilru lam niin a lang a, player-ten huaisenna nei let turin fuih phur an mamawh a, Blues fan-te lawmna thlen turin intuaihriam an mamawh - zaninah thei tak ang maw?
Real an inpeih
Madrid khaw club hian Chelsea an hmachhawn hnuah league match khat khelin, khualmualah Cadiz chu 2-0 in an hneh a, Nacho Fernández leh Marco Asensio ten goal khat ve ve an khung - Blues hmachhawn turin an inpeih.
Real boss Carlo Ancelotti chuan Vinicius Junior leh Toni Kroos chu he inkhelah hian hruai loin, Madrid lamah a hahdamtir a, Luka Modric leh David Alaba pawh bench lamah a dah - Chelsea hmachhawn tura inbuatsaih lawknaah ngaih theih a ni a, Real player-ten Stamford Bridge-ah hnehna hlado chham an châk tawh ang.
London club tan tlarhmaah Karim Benzema chu ven bik a sual lo ang tih a chiang a, Vinicius mawlh hi rilru tihahtu a tling leh dawn - Blues legend Eden Hazard pawh squad-ah a awm avangin Ancelotti-a'n bul a ṭantir kher loh pawhin, bench aṭang tala a luhtir a rinawm hle.