Nipui boruakah Arsenal an talbuai

Goal hnih an khung hmasa a, dinhmun siamṭhat zual theihna remchang lutuk atan penalty an hmu bawk. Mahse, penalty an hlah a, goal hniha hma an hruaina pawh an hum thei lo - Arsenal dinhmun a derthawng ta.

Premier League hmahruaitu Arsenal hi West Ham nen 2-2 in an inhnehtawk. Mikel Arteta naute hian point liin hma an la hruai, mahse champion lai leh pahnihna ni mek Manchester City chuan match khatin an khel tlem, an inkar hi point khat lekah a tla thei tawh a ni.

Inhnehtawk

Pathianni zan London Stadium-a inkhelah Arsenal tan Gabriel Jesus leh Martin Odegaard ten a tir lam minute 10 chhungin goal an khung hman, mikhual team lamin London Derby-ah hnehna an chang ngei dawn niin a lang hman.

Mahse, chawlhlawk hma deuhin Said Benrahma-a penalty hmangin West Ham lamin beiseina an nei thar, second half-ah Gunners lamin point thum nemngheh theihna remchang nei mah se Bukayo Saka chuan penalty a hlah.

Saka-a'n penalty a hlah aṭanga minute tam pawh a liam hmain Jarrod Bowen chuan Hammers si phurh a sut zo, hun tawp dawn lamah Michail Antonio hmangin David Moyes-a nauten chakna goal an khung teuh hle zawk a ni.

Point hnih hloh

Hmanni lawk khan Arsenal hian Liverpool lakah goal hniha hma an hruaina an hum thei lo, tunah an buaina ngaiah bawk an buai nawn - goal hniha an san fal pawhin an dinhmun a him chuang lo tihna a nih chu.

Thomas Pertey-a'n midfield laiah Declan Rice a ngam lo kha an tuar, English midfielder khan pressure pek hun a hria - penalty an hlawhchhuah theih chhan pawh a ni; Lucas Paqueta tana a ball pek a hlauhawm, defender Gabriel tan duhthlan tur dang a awm tawh lo.

Jesus-a'n penalty pet tur ni awm takin ball a keng a, mahse Brazilian striker ni loin Saka zawkin a pet. England international khan khung ni ngat se chuan Hammers tan thawh chhuah a harsa tawh ang, mahse goal zawnah a pet lo - goal hnih chauh ni loin point hnih an thamral tir.

An chau?

Arsenal hi inelna dangah an tla kim tawh - Premier League bak khelh tur an nei tawh lo. Reds khan kar laklawhah match an khel a, kartawpah Arsenal an hmachhawn zui; Hammers pawh Europa Conference khel chau an ni - Arsenal aiin chhuanlam tur an nei ṭha.

Mikel Arteta chuan, "A pawiin lungawi a harsa takzet, beiseina kan siamsak laiin keini lam kan che fuh ta si lo," a ti. April 21 zan laiah Southampton an mikhual dawn, an insiamṭha nghal lo a nih chuan thawhchhuah a harsa tawh ang.

Arsenal captain Odegaard chuan thil engkim an kutah a la awm thu a sawi - a sawi dik. Chutihrualin Man City khel turin Etihad Stadium an la pan dawn, hna a harsa khawp ang - Citizens hneha an champion thei hlauh a nih erawh chuan a ropui bik hle thung ang.

Fak phu Hammers

David Moyes-a'n Europa Conference League aiin Premier League a ngaipawimawh hmasa - Arsenal an hmachhawn tur hisapin Gent lakah a player ṭha a hahchawlhtir. Pathianni zanah chuan an ṭhat dan takin an inrem thung.

Thlak hlauhthawnawm zinga mi an ni a, an tan league point hmuh a pawimawh. Goal hnih an phurh hnuah West Ham an beidawng lo. Moyes chuan, "Season hmasa lama ṭha taka kan khelh dan khan kan khel leh thei tawh," a ti hial.

Hammers hian a zawnin season 11 chhung chu Premier League an khel tawh, tunah hian tla thei china awm Nottingham Forest aiin point liin an sang mek, khelh hmabak pariat an la neihah hian inhamtan ngei tumin an bei chhunzawm ang.