MFA Cup hmuhnawm nghal

Oriflame 23rd MFA Cup chu nimin aṭang khan Khawzawlah khelh ṭan a ni - Mizoram Football Association hnuaia district club ṭhate inelna hi a ni khat ni aṭangin a hmuhnawm nghal.

Khawzawl aiawhtu Vengthar GSA chuan Hnahthial club Bazar FC chu 3-1 in an hneh a, a thlengtu lam team tan V. Lalhriatrenga chuan goal hnih a khung. Inkhel hnuhnung zawkah Chhampai District aiawh Melbuk leh Kolasib club Project Veng FC te 1-1 in an inhnehtawk thung.

Vawiin hian a hmun ngaiah inkhel pahnih a awm leh dawn. Match hmasa zawkah Field Veng FC, Mamit leh FC Serchhip Kawnpui an inkhel dawn. Serchhip team hian inbuatsaihna an neih ṭhat thu leh, chak ngei an tum thu Vanglaini an hrilh.

Chawhnu dar 2:00-ah Lawngtlai Vengpui leh Saitual District aiawhtu Keifang Melveng FC an inkhel ang. District pahnih hi hmanni lawka Kolasib lama neih zawk tak Youth Championship final-a intawngte kha an ni, inkhel a hmuhnawm ang.