Rune hnehin Rublev a champion

Monte Carlo Masters khelh zawh takah Andrey Rublev chuan set hloh hmasa mah se Holger Rune a hneh. Russian tlangval hian Grand Slam dawta inelna ngaihhlut Masters 1000 title a lak vawi khatna a ni nghal.

Player pahnih an inkhel tawk hle, set hnuhnung berah seeded pangana Rublev hi 1-4 in a hniam zawk. Amaherawhchu, darkar khat leh minute 34 an inkhelh zawh meuh chuan 5-7, 6-2, 7-5 in a chak zawk.

Kum 25 mi Rublev hian tun hmain Monte Carlo bakah Cincinnati Open final a khel tawh, a chak lo zawkah a ṭang ve ve. Masters 1000 final a khelh vawi thumnaah a hlawhtling ve ta chiah tihna a ni.

World number 6 Rublev chuan, "Hnehna ka chan dan kha a mak khawp mai, set thumnaah khan 1-4 in ka hniam a ni satliah lo, game ruknaah khan 0/30 a ni hial bawk, mahse break point kan inchhanhim thei hlauh kha a pawimawh hle.

"Dinhmun ṭha lo taka ka din lai pawh khan beiseina ka nei a, engtin emaw ka chak thei ang tih kha ka ngaihtuah reng, chumi beiseina hmang chuan ka rawn tho chhuak a ni," tiin a chak dan a sawi.