Man United chakna Antony

Antony-a'n goal a khung bakah Diogo Dalot tan a siamsak a, a club Manchester United chu Nottingham Forest lakah 2-0 in a chakpui. Erik ten Hag-a naute hi Premier League table-ah pathumna an ni ta chiah bawk.

Pathianni zan inkhelah mikhual Man United an hlauhawm zawk, minute 32-naah Anthony Martial-a pet chu Forest keeper Keylor Navas chuan lo dang mah se ball per hi Antony-a'n hnai tak aṭangin a khung.

Brazilian forward hian second half minute 76-naah Diogo Dalot tan a siamsak bawk a, harsa vak loin point thum an hlawh chhuak. Man United hi palina Newcastle United aiin khelh zat inangah point thumin an sang ta a ni.

Eriksen awmna

Goal khungtu leh a siamsaktu chu Antony a ni a, khelmual chhunga inkhel kalhmang thlaka thununtu chu Christian Eriksen a ni thung. Denmark midfielder hian kumin January thla hnua a vawi khat nan league inkhelah bul a ṭan.

A tirah chuan Marcel Sabitzer zawk lut tur a ni, mah se ani hi warm-up neih laiin a khel bawr a hliam - a hmun ruakah Eriksen a luh a ngaih phah, coach Ten Hag tan buaina tur a awm lo a ni satliah lo, a fuh zawk tia sawi ngam a ni.

Bruno Fernandes leh Eriksen ten tharum ngah lo mah se an thiam thil hmangin ball an semkual vel a, foward Jadon Sancho leh Fernandes ten goal khung chiah lo mah se remchang ṭha an insiam thei nual.

Ten Hag chuan, "Sabitzer a hliam a, risk kan la ngam lo. Eriksen kan nei tho a, kan chhiat phah lo," tiin an squad a chhah tih a sawi. Dutch manager hian Lisandro Martinez leh Raphael Varane awm lo mah se an tlarhnung a phui avanga a lawm thu a sawi bawk.

Dinhmun ṭha lo

Player tam tak an lei khawm a, mahse Nottingham Forest hian result ṭha an nei hleithei lo. Premier League match an khelh hnuhnung 10-ah Steve Cooper-a naute hian chak ni hmel an hmu miah lo, tla mai thei dinhmunah an ding mek a ni.

Man United lakah Forest keeper Navas a che ṭha a, mahse a tan dan vek sen a ni bik lo. Forest hian chhuanlam tur an zawng a nih chuan penalty an hlawh chhuak lo kha an sawi thei ang, captain Harry Maguire leh Dalot te handball chu penalty pek an ni lo.

Forest coach Cooper chuan, "Ka hmuh dan chuan Maguire khan penalty a chawi tur a ni a, yellow card pahnihna a hmu ngei bawk tur a ni. VAR khan khatianga thil chiang lutuk a hmu lo thei kha a mak a ni," tiin a sawi.

Cooper-a naute hian an beisei ang penalty hmu ni se chuan 1-1 nih theihna remchang an nei dawn tihna a ni, mahse penalty pek an ni lo. Cooper chuan Premier League-ah meuh chuan match official lam fimkhur zual se a duh thu a sawi bawk.