James hoin Lakers an chak phawt

NBA playoff chin a nih tawh hi chuan a boruak a danglam ṭhin - Los Angeles Lakers chuan nimin zing khan seeded pahnihna Memphis Grizzlies chu 128-112 a hnehin game 1 an la.

Lakers hi play-in aṭanga tling ve hram an ni a, seeded hniam ber dawt pasarihna an ni. Bench aṭanga lut Rui Hachimura-a'n Lakers tan point 29 a nei a, a teammate Austin Reaves chuan point 23 a nei bawk.

Player ṭha LeBron James leh Anthony Davis te pahnih point belhkhawm chu 43 a tling bawk a, hnehna chang turin harsatna lian tham an tawk meuh lo - Ningani zing dar 5:00-ah game 2 an khel leh ang.

Grizzlies tan chanchin lawmawm lo a awm, guard Ja Morant chu a kut hliam vangin a inkhel tluan ve thei lo, inkhel tawp hma minute ruk la awmin court a chhuahsan a ngai, game 2 atan a dam fel hman dawn em, tih hriat a la ni lo.

Inkhel dangah Milwaukee Bucks an chak lo. Bucks hian quarter hnihna lekah an thiampuipa Giannis Antetokounmpo an chhawr thei lo a, team ṭha pahnih inkhelah Miami Heat chuan Bucks hi 130-117 in an hneh.

Miami tan Jimmy Butler-a'n point 35 a nei a, a team Heat tan hian playoff chinah match 10 chu point 35 a nei tling ta, kuminah a record hi siamṭhat belhchhahna remchang a nei ang.

Los Angeles Clippers chuan Kawhi Leonard-a point 38 hmangin Phoenix Suns chu 115-110 in an hneh. Jamal Murray pawhin point 24 a neih bakah rebound leh assist vawi riat ve ve nei chungin Denver Nuggets chu Minnesota Timberwolves lakah 109-80 in a chakpui.