Juve tlawm laiin Roma an chak

Pathianni zan Serie A inkhelah Juventus chu Sassuolo mualah 1-0 in an tlawm. Old Lady an chak loh lai hian Jose Mourinho enkawl AS Roma erawhin Udinese 3-0 in an sawp thung.

Sassuolo tan substitute Gregoire Defrel chuan inkhela goal awmchhun a khung. Serie A match bikah Sassuolo hian Juve nen vawi 21 an inkhelhah ṭum thum chiah hnehna an la chang, an tan chuan a hlu takzet.

Juve goalkeeper Wojciech Szczssny chu a la inkhel thei lo. Poland international hi Europa League an khelh laiin a thaw a hah a, lak chhuah a ngai. Serie A-ah a chawl zui a, a hmun ruakah Mattia Perin a ding thung a ni.

Point 15 paihsak Juventus hi table-ah pasarihna an ni mek. Champions League khel phak china awm AC Milan an phak lohna chu point kua a ni a, an tan season thara European football inelna sang ber beisei ngam a har rih ang.

Inkhel dangah Roma chuan Edoardo Bove, Lorenzo Pellegrini leh Tammy Abraham te goal khat ṭheuh hmangin Udinese 3-0 in an sawp a, match 30 aṭanga point 56 hmuin table-ah pathumna dinhmun an luah mek.

Mourinho chuan, "Europa League lamah khan Feyenoord lakah 1-0 in kan vanduai, kha inkhelah khan Lorenzo Pellegrini-a'n penalty a hlah a nih kha, kan result avangin social media lamah nasa taka beih kan ni tih ka hria.

"Inkhel a la tawp lo a, chak loh kha kan nihna tak pawh a ni lo. Tuna Serie A lama hnehna kan chan hi kan nihna tak chu a ni zawk," tiin a sawi a, player a siksawi kual ṭhin chu team tana thil ṭha ber tur a ngaihtuah vang a ni tih a sawi bawk.