Bengaluru-in semifinal an lut

Hero Super Cup khelh mekah Bengaluru chuan semifinal an lut ve leh ta a, Pathianni zan khan Kerala Blasters nen 1-1 a inhnehtawkin, group A hmahruaitu an ni chiang.

Bengaluru hian Roy Krishna hmangin goal hmahruai an khung a, Blasters tan Diamantakos Dimitrios chuan minute 78-naah si phurh a sut - goal dang a lut tawh lo a, Bengaluru-in hnehna chang zo lo mah se semifinal an lut.

Pathianni zana group A inkhel dangah RoundGlass Punjab chuan 1-0 in Sreenidi Deccan an hneh a, I League club zingah semifinal lut an awm dawn lo tih a chian phah.

I League champion Roundglass tan Hmingthanmawia chuan inkhela goal awmchhun a khung a, Sreenidi hian a chhanletna tur an nei lo - Sreenidi hian hnehna chang ngat se, semifinal lut tur an ni a, mahse, RoundGlass hian an beiseina an tihtawpsak a ni.

RoundGlass tan hian Hmingthanmawia bakah Brandon VL Remdika leh Freddy Lallawmawma te chuan inkhel bul an ṭan bawk a, Daniel Lalhlimpuia chu bench aṭanga luhtir a ni thung - Sreenidi tan Ramhlunchhunga chu bench aṭangin a lut ve bawk.

Hero Super Cup-ah hian Jamshedpur FC chuan an match hmasa pahnihah hnehna changin semifinal an lo lut tawh bawk a, he thu buatsaih a nih lai hian semifinal lut pahnih an awm tawh, tihna a ni.