Goal khung ngei ngei ngai Napoli

Zanin dar 12:30 hian Napoli chuan Champions League quarterfinal second leg khel turin AC Milan an mikhual dawn. San Siro-a an inkhelh ṭumin Milan hian 1-0 in hnehna an chang, zaninah an hmabak minute 90 an khel chhunzawm dawn a ni.

Milan hian semifinal lut turin goal neihsa venhim a tawk, chutih laiin Napoli tan erawh an mumang chhunzawm turin goal an khung ngei ngei a ngai thung - an inkhelhna tur hi Naples khawpui a ni a, goal phur mah se Luciano Spalletti naute dah hniam a rem lo.

Napoli beiseina tisang turin Victor Osimhen leh Mike Maignan te an inlan thei dawn. Nigeria tana a fehchhuahna lamah Osimhen a inhliam a, a hliam vang hian first leg a khel thei lo a ni.

An chak loh hnuah Napoli coach Spalletti chuan, "Second leg-ah chuan Osimhen a khel tawh dawn," tiin a striker a rintawk thu a sawi, a thusawi hian fans lam rilru pawh a hnem ngeiin a rinawm.

Serie A season kal laia goal 21 khung tawh striker hi kar tawpa Hellas Verona nen an inkhelh ṭumin a inlan thei tawh, goal khung nghal lo mah se AC Milan hmachhawn turin inbuatsaihna a nei ṭha tawk tihna a ni.

Napoli coach Luciano Spalletti chuan, "Osimhen hi chu a tlan chakin tharum a ngah, ball a chan tawh hi chuan kawng hrang hranga kalpui dan a thiam, hei hi kan khingpui te tana hna harsa lai chu a ni leh dawn," tiin a sawi.

Serie A nomawi chu Napoli hian Milan kut aṭangin an chhuhsak ngei dawn niin a lang tawh, coach Stefano Pioli leh a naute tan chuan Champions League aṭanga Napoli pet chhuah hi thil châkawm tak a ni ngei ang.

Milan hian Serie A an intawn hnuhnung berah 4-0 in an hneh a, Champions League-ah 1-0 in hma an hruai mek bawk - European football bikah chuan tawnhriat nei ṭha leh chungnung zawk an ni a, zaninah pawh khualmuala inlan tur ni mah se an zam hauh lo ang.