Damdawi inah Ciro Immobile

Car chetsualnaah Ciro Immobile a inhliam a, a hnungzâng leh a khel bawr hliam vangin Italy international striker hi damdawi inah enkawl mek a ni.

Kum 33 mi Immobile hian kar tawp inkhelah khan Lazio tan goal a la khung, a club hi 3-0 in Spezia lakah a chakpui. A hliam vang hian eng chena rei nge a chawlh dawn tih erawh sawi theih a la ni lo.

Lazio chuan thuchhuah siamin, "Roma khawpuia awm Policlinico Universitario Agostino Gemelli IRCCS-ah professor Francesco Franceschi kaihhruainain enkawl mek a ni," an ti a, a dinhmun a ngaihtuahawm lutuk lo niin an sawi bawk.

Italy tan match 55 a khelh aṭanga goal 15 khungtu hi a chawl rei a nih chuan Lazio tan chânna lian a ni dawn. Inrinni zan hian Torino an mikhual dawn a, he hunah hi chuan a inkhelh theih a rinawm loh a ni.