Barcelona-in goal an khung lo leh tawh!

La Liga hmahruaitu Barcelona chuan a zawna a vawi hnih nan league match-ah goal an khung lo leh ta a, an mikhualna ramah Getafe chu 0-0 in an inhnehtawkpui.

Catalan club hian goal an khung loh avangin fal taka hma an hruai chhunzawm theihna chu an bawhpelh a, Real beiseina thi ṭep tawh chu an chhit nunsak leh hram - team pahnih inkarah point 11 chauh a awm tawh.

Real-in Villarreal an hneh loh khan Barca hi chak se Madrid khaw club nena an inkarah point 15 awm tur a ni. Mahse, Girona lakah goal an khung lo a, tunah Getafe laka an khung loh leh tak avangin an inkara point awm zat chu point 11 a ni.

Tun hnaia Barca result avangin chetsual theih reng a la ni, tih a lang chiang thar a, Catalan club tan fimkhur a ngai - an nomawi beisei theih awmchhun ni tawh La Liga hi an chân leh a nih ngat chuan fans thinrim an tuar ngam kher lo ang.

Inkhel nung

Getafe khelmualah goal lut lo mah se inkhel ṭantir aṭangin boruak a nung nghal a, mahse, beisei loh taka chance nei hmasa zawk erawh mualneitu Getafe an ni - mahse, he chance duhawm tak hi Barca forward hlui Munir El Haddadi chuan hnai tak aṭangin a tauh lut thei lo.

Barca-in chance hlauhawm tia sawi tur pawh an neih hmain chanchin lawmawm lo an nei zui a, minute 17-na lekah Sergi Roberto chu malpui hliam vangin lakchhuah a ni - Xavi-a'n a duh aia hmaa substitution a siam a ṭul phah a, Eric Garcia a luhtir.

He thu buatsaih a nih lai hian Sergi Roberto hliam chen tur tak hi chiang taka sawi a la awm lo a, coach Xavi chuan, "Hliam na tak a nih loh hram kan beisei," a ti a, a chawlh rei a rinawm lo.

Barca tana chanchin lawmawm erawh an squad a chhah ṭha tawk a, Champions League aṭanga an tlak tawh bawk avangin an match hmasa ber chu April 23-ah an khel leh dawn chauh - chawlh hahdamna hun a tam.

A thlawn mai

Roberto lakchhuah a ni a, Getafe-in chance duhawm an nei zui. Corner aṭanga ball kal chu Enes Unal chuan tauh luhna remchang a nei a, mahse, bar chungah chiah tauhin, a hun ṭha neih a chhawr thei lo.

Barca an harh zawk - goalkeeper Marc-Andre ter Stegen-a goal kick aṭanga ball kal chu Raphinha chuan ṭha zetin a um lut a, mahse, Brazilian forward hian a khung ngei tawh tura ngaih chu post pet per nan a hmang - a uiawm takzet.

A la tawp mai lo. Hemi per aṭanga ball kal chu Alejandro Balde chuan goal ruakah khungna remchang nei mah se Raphinha tih thik ni awm takin, post ngai bawk a pet per a, 1-0 ni thei mai tur kha 0-0 a nih chhunzawm.

Fan-ten an zawn mek laiin, Robert Lewandowski pawh a rawn lang nawlh a, mahse, Polish striker ball tauh chu Getafe keeper David Soria chuan ban chatin a lo mansak a, Lewy vanneih zan a ni lo.

Van a duai

Second half-ah pawh Barca an vanduai chhunzawm - minute 54-naah Franck Kessie-a'n a chance neih a chhawr lo a, a hnu minute hnih lekah Lewy chuan a chance neih a tauh goal chuang lo bawk.

Minute 75-na a ni a, Raphinha bawk kan hmu nawn. Mahse, Brazilian forward hi hemi zana goal khung tura duan a ni lo em ni chu aw, tih mai tur a ni a, a shot ṭha tak chu Getafe keeper Soria chuan engmah lo mai a chantir.

Hun tawp dawnah Barca an chesual teuh hle - Getafe striker Borja Mayoral chuan hnai tak aṭangin chance a nei a, mahse, uiawm takin a hlah. A tawpah team pahnihin point an insem a, relegate hlauhthawnawma ding Getafe tan result ṭha a ni.

Barcelona hian an league match khelh leh tur hmasa berah Atletico Madrid an hmachhawn dawn a, April 23 zana an mikhual tur team hi point hloh theihna an nih avangin Catalan club tan fimkhur a ngai ta hle.

Inkhel dang

Atletico Madrid chuan pahnihnaah tal season khar an duh tih pholangin, an mikhual Almeria chu 2-1 in an hneh a, Antoine Griezmann chuan goal hnih a khung - Almeria tana Leo Baptistao goal khungin awmzia a nei lo.

Relegate thei dinhmuna ding mek Almeria tan result ṭha a ni lo a, season tharah inhamtan a harsa zual sawt dawn tih a chiang. Diego Simeone enkawl Atletico erawh a zawna league match vawi ruk an chakna a ni.

April 20 zana Manchester United mikhual tur Sevilla-in Valencia chu 2-0 in an hneh a, Loic Bade leh Suso ten goal khat ve ve an khung. Sevilla-in relegation zone an tlansan zel a, Valencia erawh table-ah 18-na an ni mek.

Hetihlai hian Girona chuan table mawngphah luahtu Elche chu 2-0 in an hneh a, Valentin Castellanos leh Oriol Romeu te chuan goal khat ve ve an khung.