Bayern khelmualah City an leng dawn

Champions League quarterfinal-a Bayern Munich leh Manchester City an intawng dawn tih a chian khan, tam takin City an nuih a, Premier League club hian an duh ber Champions League nomawi chu an chawi leh dawn loah an ngai.

Mahse, Pep Guardiola-a enkawl City hian quarterfinal first leg-ah harsatna awm miah loin Bayern hi an hneh a, 3-0 ngawtin an lo sawp - Rodri, Bernardo Silva leh Erling Haaland ten goal khat ṭheuh an khung.

Zanin dar 12:30-ah quarterfinal second leg hi khelh a ni dawn a, Bayern khelmualah City an lenglut dawn - Bayern tan semifinal lut tur chuan si thum tal goal khung a, goal chhuah loh a ngai tihna a ni a, German team hmabak hi a awlsam lo hle.

Mahse, Allianz Arena-a inkhel tur an ni miau a, German club induh tawk ve tak hian City laka tlawm hi 'na' an ti dawn - a thlen nawn lohna turin zaninah goal khung tam an mamawh a, inkhel a hmuhnawm loh ring suh.

Buaina ral lian

Bayern an inngaihlu a, coach Julian Nagelsmann kaihhruaina hnuaiah inelna an telnaah nomawi an la beisei vek chungin an ban a, a aiah Chelsea boss hlui Thomas Tuchel an lalut - tunah rih chuan an tifuh lo hle.

Bundesliga lamah point hnihin hma hruai mah se, DFB-Pokal quarterfinal-ah SC Freiburg ngam loin an tla a, Champions League-ah City an ngam lo a, an league match hnuhnung berah 1899 Hoffenheim chu 1-1 in an inhnehtawkpui ringawt!

German club buaina belhchhah turin City laka an chak loh ṭumin Mane-a'n Leroy Sane chu kut a thlak a, German forward hi mipui hmaa a inlan leh hmasa berah a hmui a vung nasa hle - an boruak a ṭha lo tih hai rual a ni lo.

Bayern-in Senegalese forward aiin Germany international Sane an ngai pawimawh zawk a, Mane hi nipui transfer-ah hralh an tum tih thawm thlengin a awm mek - he team boruak hi a ṭha lo tih zep rual a ni lo a, boruak ṭhat loh laia City mikhual hi an châk lo ang.

Buaina kha chakna

Bayern boss Tuchel chuan, "Engkim a tawp tawh. Mane hian ngaihdam a dil tawh a, buaina a awm tawh lo. Kan bulah pangngai takin training a nei leh tawh a, a training chhunzawm zel ang," a ti a, match khat atana hrem Mane chu City hmachhawn tur squad-ah a awm tur thu a sawi.

Hetihlai hian striker Eric Maxim Choupo-Moting chu hliam vanga a chawlh hnuin a lo kir leh tawh bawk a, Bayern-in inhliam tharlam dang an nei rih lo - Manuel Neuer leh Lucas Hernandez chu inhliam sa an ni.

Tun dinhmuna zawhna awm erawh, "Mane a inlan ang em?" tih chu a ni a, Senegalese forward hi dam mah se tun hnaia a chet dan avangin chhawr zui chi a ni kher lo mai thei - Mane hian tun season-ah Bayern tan goal 11 a khung tawh.

Bayern team buaina hian khelmualah nghawng a neih rinna a lian a, mahse, German club lo enkawl tawhtu Pep chuan, "A chang chuan team inlungrual tak nei tur hian buaina a thlen a ngaih chang a awm ṭhin - he buaina hi Bayern tan chak lohna ni loin, team tichaktu zawk a nih ka ring," a ti.

Tuchel tan fiahna

Bayern hian group stage-ah team ṭha Barcelona leh Inter Milan awmpui mah se match ruk an khelha chak vek chungin last 16 an lut a, last 16-ah hian Lionel Messi leh Kylian Mbappe awmna Paris Saint-Germain chu an pet chhuak nghal bawk.

Mahse, heng zawng zawng hi Nagelsmann-a tan a hna humhim nan a tawk zo chuang lo a, ban a ni ta tho - Tuchel an lalut a, City lakah 3-0 in an tlawm zui. German coach hian zaninah City a lehthal thei lo a nih chuan, Bundesliga champion hian season khata coach pahnih thlak an pawi ti lo ang.

Tuchel hian kum 2021 khan Champions League final-ah Manchester City hi Chelsea hmangin a lo hneh tawh a, Pep-a leh a naute thinlung tihnat nawn hi a hreh lo ang - chumi tur erawh chuan tun season-a goal 17 khung tawh Choupo-Moting, Jamal Musiala, Kingsley Coman leh Sane te an ṭangkai dawn a, Mane a lut thut thei bawk.

Chutihrual chuan goal chhuah belh lo turin goalkeeper Yann Sommer hoin tlarhnungah Benjamin Pavard, Dayot Upamecano, Matthijs de Ligt leh Alphonso Davies te an ṭan mar a ṭul a, Joshua Kimmich leh Leon Goretzka te midfield-ah an ṭangkai bawk ang.

City an ṭha

Pep-a City hian goal khung an uar hle - tun season Premier League ringawta an goal khung zat hi goal 78 a tling tawh a, Bayern an sawp hnua an match khelh awmchhunah Leicester City chu 3-1 in an hneh leh tawh bawk.

Spanish coach hian Foxes lakah hian midfielder Ilkay Gündogan, defender Nathan Ake leh Manuel Akanji te ho bench-ah a hahdamtir thei a, Erling Haaland leh John Stones pawh minute 45-naah la chhuakin, Rodri (53'), Kevin De Bruyne (62') leh Jack Grealish (74') te pawh chawlh hahdamna hun a siamsak thei - Phil Foden erawh damlohna avangin a la chawl.

A tawi zawnga sawi chuan City hian an ṭhat dan berin Bayern an lenchilh thei dawn a, Pep-a tan hlauhthawn tur a awm lo - German club tan tun season match 40 aṭanga goal 47 khung tawh Haaland leh match 40-a assist 25 nei tawh KDB dan hi a awlsam lo ang.

Hetihlai hian Pep erawh a ṭawng fimkhur hle. Bayern boss hlui chuan, "Engmah a la tawp lo. Kan thiam dana khelh a, hnehna chan kan tum a ngai - an ṭhat avangin tlarhnung ngaih pawimawh a ṭul. Team ṭha tak an ni a, thil ropui tak tih tumin, semifinal luh tumin kan kal dawn a ni. Rilru paukhauh takin, hun harsaah pawh ding nghet tlat chunga kan khelh a ngai dawn," a ti - zanin chu meng rei ang aw!