Leeds khelmualah Liverpool-in goal an surtir

Jurgen Klopp-a Liverpool an tho ta - tih hluai kan tum a, mahse, he Liverpool team hi goal an khung ṭeuh hnu lawka chetsual an chin avangin kan ti ngam leh lo! Mahse, Leeds United khelmuala chiang taka an chak thu erawh huaisen taka ziah ngam a ni e.

Liverpool hian Thawhṭanni zan khan Leeds United chu 6-1 ngawtin an sawp a, an league match hnuhnung pangaa an vawi khat chakna a ni - Liverpool fans lawmin an lam ve leh ta.

Reds tan hian Mohamed Salah leh Diogo Jota te chuan goal hnih ve ve an khung a, Cody Gakpo leh Darwin Nunez ten goal khat ve ve an khung bawk - Leeds tana Luis Sinisterra goal khung chu mualpho zualpui khuhna chauh a chang.

Liverpool hian league match 30 an khelh aṭangin point 47 an nei ta a, palina Newcastle United chu point kua ngawtin an la thlau - season thara Champions League khel turin thilmak a thlen tel a la ngai cheu.

Liverpool tak tak!

Elland Road-a inkhelah Liverpool-in mikhual tlangnel zia an chhuah a, minute 35-na lekah Gakpo chuan goal hmahruai a khung. He goal a luh theih nan hian Trent Alexander-Arnold a ṭangkai takzet.

English right back hi Junior Firpo chuan a banah ball tihper mah se referee leh video assistant referee ten hamrik hamna tur khawpah an ngai lo - Arnold hian chak taka ball tlan luhpuiin, Salah nen an inpek tawn hnuah Gakpo tan a siamsak a, Netherlands forward tan goal khung harsa a ni tawh lo.

Liverpool an phur laklawh. Goal an khung aṭanga minute lina lekah Salah chuan a belhchhah leh sak - Weston McKennie ball dawn chu Jota chuan chhuhsakin, ṭha zeta a tlan luhpui hnuah Salah tan a pe a, Liverpool thiampuipa hian goal-ah a chantir.

Klopp-a team te an hmuhnawm takzet. Kil tinah hmuh tur an awm - an tlan tam a, an taima a, ball an hlohin an chhuhlet zung zung a, Liverpool team tak tak kha hmuh tirin kan awm. An la chuai mai dawn lo!

Goal a sur

First half-ah Liverpool-in 2-0 in hma an hruai a, second half-a goal khung hmasa erawh Leeds an ni - Ibrahima Konate chetsual zar zoin Sinisterra chuan ṭha zetin si phurh a sut ṭhen a, Alisson a pet khum dan chu a fing hle.

Leeds-in comeback beiseina an nei dawn emaw an inti a, mahse, Liverpool an chhaih kawlh lek a ni si. Goal an chhuah aṭanga minute ngana lekah Jota a inlar a, Curtis Jones siamsak ṭha zet chu an goal thumna ni turin a khung - Portuguese forward tan April 2022 hnua a goal khung hmasak ber a ni.

Leeds-in hun ṭha nei ve leh mah se, Brenden Aaronson chuan uiawm takin woodwork a tihper a, an tuar zui. Reds tan Gakpo siamsak chu Salah chuan ṭha zetin goal-ah a chantir a, tun season-a league goal 15 a khungna chiah a ni. A la tawk lo cheu - Jota a inlar ve leh a, Jordan Henderson siamsak chu a goal hnihna ni turin a khung.

Liverpool-in goal nga zet an khung hnuah pawh inthlahdah an tum lo. Arnold chuan ball pet thiam bik a ni tih minute 90-naah a pholang a, bench aṭanga luhtir Nunez khung tur chu tawih zeta siamsakin, Uruguayan striker hian tun season inelna hrang hranga a goal 15-na ni turin goal-ah a chantir a, hun a tawp zui.

Khua a var dawn?

Tun season zet chu Liverpool hi sawi thiam an harsa hle - league match hmasa pathuma chak zo lo chungin season bul an ṭan a, match linaah Bournemouth chu 9-0 ngawtin an sawp! Reds ṭantuten an tho leh taah an ngai a, mahse, hei hi an thawh leh hnaih lai ber a ni!

Bournemouth an hneh hnua an match hmasa paliah vawi khat chiah an chak! Reds hian March thlatir khan an hmelma kumhlun Manchester United chu 7-0 ngawtin an sawp a, match li zet a zawna an chak zawh loh hnua a zawna match nga an tlawm lohna a ni tel bawk a, Champions League an sawi ri leh ṭan.

Mahse, a mak asin - mahse, tih a ngai leh tlat! Season ṭantira 9-0 zeta an sawp Cherries kha 1-0 in an ngam lo a, Manchester City-in 4-1 in an lo sawp a, Chelsea (0-0) leh Arsenal (2-2) lakah an chak zo lo zui a, Champions League chu hla tak a ni leh tawh.

Hetihruala thil lawmawm erawh, Arsenal lakah chak zo lo mah se Liverpool hi an vanduaia tia sawi theih khawpin an khel ṭha a, si hnih an phurh hnua an comeback dan chuan Reds fan-te lung a dum takzet - tunah Leeds lakah goal an sur tir leh ta, khua a var dawn ta em ni? tia beiseina an nei a nih pawhin, keini chuan kan dem lo e.