Goal khung hnem ber Serchhip

Oriflame 23rd MFA Cup chu Khawzawlah khelh mek zel a ni a, match pali an khelh tawh chinah FC Serchhip Kawnpui chu goal khung hnem ber an la ni.

Serchhip District team hian nimin khan Mamit aiawha kal Field Veng chu 5-1 in an sawp. Mamit team hian ball an vawrh nasa a, an tlan tam bawk. Mahse, inbuatsaihna nei ṭha FC Serchhip Kawnpui lamin remchang an neihah an lo chhu let chat zel.

Nimin inkhel pakhat zawkah Saitual District aiawhtu Melveng FC chuan Lawngtlai Vengpui chu 2-1 in an hneh. District pahnih hi Kolasib-a neih tak Youth Championship final-a intawngte kha an ni a, senior huanga district pahnih intawn lehna hmasaah result a inthlak ta a ni.

Mizoram Football Association (MFA) hnuaia district hrang hranga club inelna Oriflame 23rd MFA Cup hi vawiinah khelh chhunzawm a ni leh dawn. Aizawl District aiawha kal Sihphir Venghlun leh TMFC, Melbuk te an inkhel ang.

Melbuk hian an match hmasa zawkah Mizoram Premier League khel tur Project Veng FC chu an inhnehtawkpui thei, vawiinah pawh chak an tum ngam ang. Project Veng hian inelna thlengtu Khawzawl Vengthar an hmachhawn ve leh thung dawn a ni.