Kan khelh ṭhat ber a ni - Klopp

Premier League club talbuai Liverpool chuan Thawhlehni zan khan 6-1 in Leeds United an sawp a, Reds boss Jurgen Klopp chuan Leeds laka an khelh dan chu tun season-a an khelh ṭhat ber a nih thu a sawi. German coach chuan, "Kan khelh danah ka lungawi takzet. An chetsual theih nan kan nawr a, goal ropui tak tak kan khung a, counter hmanga kan nawr let dan lah hun engemaw chen chhunga kan tih ṭhat ber a ni hial ang.

"Ka lawmna ber erawh minute 92-naa Leeds player ball keng lai ka player paliten an chuh kha a ni. Thlirna hrang hrang aṭanga ka thlir pawhin, tun season-a kan khelh ṭhat berah ka ngai a ni," a ti.

Klopp chuan, "Football ṭha tak khel tur chuan kan din ngheh a ngai a, chu chu tlarhnung aṭanga bul ṭan chi a ni. Kaltluan loh laia chu thu sawi a ngaih fo chuan thutlukna kan siam sual tihna a ni ṭhin - khel ṭha turin tlarhma hi a pawimawh hmasaah kan ngai ṭhin a, a hun takah che zel ta ila, chutiang tak chuan kan tithei ngei bawk ang.

"Match ṭhenkhatah khan engvangin nge kan counter attack kha a fuh tawk ṭhin loh ka hre lo a, zaninah chuan a dik ta a, Arsenal lakah khan second half-ah a dik bawk. Zaninah khan kan ball hloh kan chuh let hnuah goal engzah nge kan khung ka hre lo a, mahse, chu chu danglamna thlentu a ni. Hei hi chu kan hriatsa vek a ni a, chutihrual chuan hriatna leh hriatthiamna ringawt piahlamah a taka tih a ngai a ni," a ti.

Liverpool-in hnehna an chan rualin season thara Champions League khelh phak erawh thil harsa a la ni dawn. Mahse, 2020-21 season khan an match hnuhnung aṭanga point 30 hmuh tur awmah point 26 hmuin, Champions League an inpetkai thei.

Klopp chuan, "Tun season leh kha season danglamna chu, top four china awmte nen hian tunah chuan kan inthlauhna hi a tam tlat a ni. Engtinnge season kan khar dawn ka hre lo a, mahse, tuna kan khelh dan hian season thara kan kal dan tur a hril avangin match tin hi kan hriatthiam zel a ngai.

"Eng match pawh hi a pawimawh - eng thil mah kan hlawh chhuak ta lo a nih pawhin, season chawhnu lama chet ṭhat a, season thara chhawm nun kan duh. Champions League kan hnaih thei dawn em, ka hre lo a, chu chu thil pawimawh ber pawh a ni lo. Tuna kan duhna, châkna leh hriatthiamna ang zel hian khel ila ka duh ber a ni," a ti.

Hetihlai hian Leeds erawh table-ah 16-na niin, relegation zone an hlat hleithei lo - season ṭantirah club neitu Andrea Radrizzani-a'n season hmasa anga relegate hlauthawnga khelh an tum tawh loh thu sawi mah se, a harsa a ni!

Leeds boss Javi Gracia chuan, "Kawng khat chauh a awm - rim taka thawh a, hmasawn a ni mai," tiin Premier League inhamtang tura theihtawp an chhuah tur thu a sawi.