Chelsea leh Nagelsmann an inbia

Season thara an manager nghet tur zawngin Chelsea chuan mit an len mek a, an team hmasawnpui thei tur an zawng - Bayern Munich ban tak Julian Nagelsmann chu an bia a, inremna erawh an la nei lo thung.

Blues hian tun season chhungin coach pahnih Thomas Tuchel leh Graham Potter te an ban tawh. Season tawp thleng atan tun hma lama an ban tawh Frank Lampard chu an ruai lailawk leh mek a ni.

March thla khan Bayern Munich chuan Nagelsmann hi an ban a, an hmun ruak luah turin Tuchel an la thung - tuna an khelh dan leh result an neih chinah chuan Bavarians hian an tifuh tehchiam lo.

Chelsea pawhin Lampard an lalut hi an tifuh lem lo, manager nghet tur pawh an zawn fimkhur phah hle niin a lang. Nagelsmann bakah hian Luis Enrique chu London club enkawl thei tur zinga mi niin an sawi.

Nagelsmann hi kum 35 mi chauh la ni mah se team enkawl lamah chuan tawnhriat a ngah tawh, hmathlir thui tak an nei a nih chuan Chelsea tan lak a fuhin a rinawm, chutihrualin Blues hi team dawhthei tak an ni lem lo thung.

German manager Nagelsmann hi Tottenham Hotspur pawhin an beisei mek. Premier League a pan dawn a nih chuan Nagelsmann hian Spurs ai chuan Chelsea zawm a thlang zawkin a rinawm - thu chiang erawh a la awm lo.

Chelsea hian champion thiam, tawnhriat nei ṭha leh club lian dangte elphak manager an zawng a nih chuan Enrique hi a chhanna dik a nih theih a rinawm. Chutihrualin Spanish manager hi mahni thu duh tak mai a ni a, a duh anga thil kalpui a awlsam lo ang.

Enrique hian Barcelona tan hlawhtlinna hrang hrang a chang tawh, an ram Spain a enkawl pawhin inkhel hmuhnawm an chhawp chhuak ṭhin. Player a thlan danah erawh midang ngaihdan a ngaichang teh vak lo, a khelhtir duh anga khel thei a ko mai ṭhin.

Chelsea neitu Todd Boehly hian tun dinhmuna duhthlan tur a neih ṭhat chu Enrique leh Nagelsmann te an ni, sum an neih avangin manager chungchangah chuan an duh zawk an thlang theiin a rinawm.