Aizawl FC-in point nen Super Cup an khar

Hero Super Cup-a an match hnuhnung berah Aizawl FC chuan 2-2 in East Bengal an inhnehtawkpui a, Kolkata club an hmachhawn hmaa point hmuh la nei lo Mizo club hian point khat nen Hero Super Cup an khar.

East Bengal hian Naorem Mahesh Singh leh Sumeet Passi hmangin minute 21 chhungin goal hnih an khung hman a, awlsam takin an chak mai dawn niin a lang hman.

Mahse, Mizo club tan Hk Lalhruaitluanga leh David Lalhlansanga ten goal khat ve ve khungin, si phurh an sut zo a, 2-2 in team pahnih an inhnehtawk - Mizo club an mualpho bik lo e.

Thawhṭanni zana Super Cup inkhel dangah Odisha FC chuan 2-1 in Hyderabad an hneh a, semifinal an lut - Hyderabad tan Javier Siverio chuan khung hmasa mah se Odisha tan Diego Mauricio leh Víctor Rodríguez ten si phurh an sut a, a thiam pali zingah an tel.

A goal hma

Payyanad Stadium, Manjeri-a inkhelah goal khung turin East Bengal-in hun an mamawh rei lo. Minute 17-na lekah captain Cleiton Silva ball pek ṭha tak chu Naorem Singh chuan goal-ah a chantir a, AFC tlarhnungten an hna an thawk ṭha tawk lo.

Minute li a liam hman chauh a, Mizo club an chesual nawn - VP Suhair-a ball cross chu AFC keeper Vanlalhriatpuia'n a chhut sual a, Sumeet Passi chuan harsatna nei loin goal-ah a tauh lut a, 2-0 a ni.

East Bengal hi awlsam takin an chak mai dawn niin a lang hman. Mahse, Mizo club-in ngaihdan dang an nei - ṭha taka ball an inpek kual hnuah Akito Saito hun ṭha neih chu East Bengal keeper Kamaljit Singh chuan lo tibuai hman mah se ball hi a per chhuak.

Ball per chhuak hi David Lalhlansanga chuan lo chang fuhin, Hk Lalhruaitluanga tan a siamsak a, Hruaitea tan goal ruaka khung turin harsatna a awm tawh lo - Mizo club-in beiseina an neih phah a, 2-1 in chawlhlawk an hmang.

A tawp kharna

Victor Lalbiakmawia enkawl Mizo club-in India coach hlui Stephen Constantine enkawl, ISL club East Bengal lakah chak theih a ni, tih an hria a, huaisen takin Kolkata club hi second half-ah an nawr zui.

I League champion pawh lo ni tawh AFC hian goal khung turin an nghah rei a ngai lo - minute 48-naah khel ṭha em em mai David Lalhlansanga a inlar a, penalty box pawn aṭanga hla veh vawh tak aṭangin goal mawi bik a khung.

Aizawl FC goal nawr chu East Bengal keeper Kamaljit chuan tlan chhuak chungin a pet chhuak a, hei hi Brazilian midfielder Alex chuan lo dang mah se a per lehlam chu David-a ke bulah a tla a, David hian Kamaljit-a tlan chhuak chu pet khumin, goal-ah a chantir a ni.

Mizo club tan David bawk hian Lalchhanhima Sailo siamsak chu goal-ah a chantir a, mahse, assitant referee-in offside a phar avangin goal-ah pawmsak an ni lo a, Mizo club-in point khatah lungawi an zir - East Bengal tan hian Lalchungnunga chu a inlan.

Odisha an tlang

Aizawl FC awmna group B inkhel dangah Odisha an chak a, Hyderabad chu 2-1 in an hneh - Indian coach Clifford Miranda enkawlna hnuaiah Odisha hian semifinal an lut zui a, champion beiseina an nei zel.

Team ṭha zawka ngaih Hyderabad tan Javier Siverio chuan minute 11-naah goal hmahruai a khung a, ISL club ṭha hian hnehna an chan mai a rinawm hman -goal dang lut loin chawlhlawk hman a ni.

Mahse, minute 55-naah Odisha tan Diego Mauricio chuan si phurh sutna goal a khung a, hun tawp nan minute li chiah a awm tawh tihah Víctor Rodríguez chuan chakna goal a khung zui.

Odisha tan hian Jerry Mawihmingthanga chuan inkhel bul a ṭan a, midfielder Paul Ramfangzauva leh forward Isak Vanlalruatfela te chu bench aṭanga luhtir an ni bawk.