Ka chetsual chhan ka hrethiam lo - Bagnaia

MotoGP rider champion lai Francesco Bagnaia chuan kartawpa tlan zawh tak Grand prix of the Americas a thlirlet a, point hmuh theih inbeisei tak chunga a chesual chu pawi a ti hle - a chetsual chhan tak pawh a hre thei rih lo a ni.

Tun season aṭangin 'Sprint Race' an nei ṭhin, intlansiak pangngai neih hmain an tlan ṭhin a, point chhiar vek a ni. Sprint race-ah Bagnaia hian hnehna a chang a, intlansiak takah erawh a tlan tluan ve thei lo.

Bagnaia chauh a ni lo - Circuit of the Americas-ah hian rider pakua ngawtin inelna an hmachhawn zo thei lo, tun season inelna an neih tawh chinah chuan chesual an tam berna hmun a la ni hial.

Kum 26 mi Bagnaia chuan, "A pawi ka ti a, ka hrilhhaiin a ngaihna ka hre lo takzet a ni. Argentina-ah khan tihfuh tawk loh ka neih ka hria, chumi chu ka siamṭha nghal chuan ka hria a, mahse result ṭha lo ka nei thung.

"Ka chunga thil thleng kha ka hrethiam thei mai lo, mahse infiamna chuan hetiang thil hi a keng tel ve bawk," a ti a, intlansiak an hmachhawn leh turah chuan dinhmun ṭha a luah ve leh theih ngei tawh a beisei tih a sawi bawk.