U-20 World Cup thleng tur Argentina

Football thuneitu sang ber FIFA chuan Under 20 World Cup thleng turin Argentina a thlang, a tirah chuan inelna hi Indonesia thlen tur ni mah se harsatna a awm avangin a thlengtu hi thlak a ni.

Indonesia hian Bali-ah inelna hi thlen an tum a, ruahmanna pawh thui tak kalpui a ni tawh. Mahse, an Governor chuan Israel team mikhual a duh lo, hei vang hian Indonesia Football Association chu an inhnukdawk.

Argentine FA chuan kumin May 20 aṭanga June 11 inkara khelh tur hi an dil a, hun tepter tawh takah South Amercian ram hian ram leh ram football hmanga inelna a thleng dawn tihna a ni.

FIFA President Gianni Infantino chuan, "Argentina FA president Claudio Tapia leh a thawhpui bakah sorkar thuneitu chungah lawmthu ka sawi, hun chep tak kara a inpekna hi ropui ka ti hle," a ti.

Argentina hian 2001 khan Under 20 World Cup hi an lo thleng tawh a, an champion a ni. Rawlthar rual inelnaah hian Argentina hi ṭum ruk champion tawhin record an nei ṭha hle.

World Cup pangngai pawh Argentina hian thlen an dil dawn. Uruguay, Chile leh Paraguay te nen World Cup 2030 chu a huhoa thlen an indil ṭawm dawn a ni.