Inzaghi leh a naute tan chak a ngai

Inter Milan chuan zanin dar 12:30 hian Benfica an mikhual dawn. Champions League quarterfinal fist leg-ah Inter hian 2-0 in hnehna an chang tawh a, semifinal lut turin an dinhmun a ṭha tawh hle.

Italian club ṭha hian Serie A lamah erawh beisei an phak lo, chuvangin coach Simone Inzaghi tan a hna ngai thawk chhunzawm zel thei tur chuan Champions League-ah result ṭha a neih ngei ngei a ngai, chu chu a him theina kawng awmchhun a ni.

Inzaghi tan

Serie A-ah Inter hi pangana an ni mek, an match hnuhnung berah Monza chu 1-0 in an ngam lo. Sporting hneha an boruak ṭhat lai takin league-ah chuan an che hleithei chuang lo tihna a ni.

Inter vice-president Javier Zanetti chuan, "Inter hi team ṭha tak kan ni a, mahse Serie A lama kan result hi chu pawmzam mai theih chi a ni lo. Club thuneitu lam chuan Simone Inzaghi kan thlawp.

"Chutihrualin tuna Benfica nen kan inkhelh tur hi kan hma hun hril thei tur a ni," a ti a, an chak lo a nih chuan coach Inzaghi tan a hna ngai chelh reng a harsa ang, tun hnaiah ban duhtu tam mah se UCL lama an chet ṭhat avangin a la him hram tih chu a chiang.

Nerazzurri hian goal khung an harsat tlat a, chu chu an buaina chhan lian tak a ni. Sporting lakah Romelu Lukaku-a'n goal a khung a, zaninah pawh a lak aṭangin goal dang an beisei leh ang - hliam vanga a buai reng hnuah ngai erawh a la awh theih meuh lo.

Lautaro Martinez-a'n March 5 hnu lamah goal a la khung lo a, striker dang Edin Dzeko pawhin January 18 hnuah goal a la nei leh lo. Benfica lakah chuan goal venhim a pawimawh zawk a, tlarhma lam an vannei - mahse club thuneitu lamin goal khung lai an hmu châk.

Beisei nei Benfica

Inter Milan an hneh loh hnuah Benfica hian Portuguese League lamah Chaves chu 1-0 in an ngam lo zui. Goal hnih phur sa an ni dawn a, tunlai an boruak thlir chuan San Siro luhchhuah chu thil huphurhawm tak a ni ngei ang.

Benfica Coach Roger Schmidt chuan, "Tlang sang tak lawn tur kan nei, lawn ṭan hma aṭanga beidawng nghal ngawt chi chu kan ni ve lo. Kan tih tur hi harsain hautak viau mah se keini chuan theihtawp kan chhuah dawn," a ti.

Schmidt chuan sawi zawmin, "Nilaini zan a lo thlen chuan ka naute pawh an hahdam hman tawh ang, an rilru put hmang pawh a danglam daih tawh ang. Ka hmuh dan chuan a bul ṭan tur 11 mai bakah bench-a ṭhu tur pawh kan nei ṭha," tiin a inringtawk hle.

Primeira Liga-ah Benfica hian match 28 aṭangin point 71 an hmu a, table chung berah an awm - pahnihna Porto aiin point liin an sang mek a, league champion ni turin an dinhmun a la ṭha thawkhat hle.

Schmidt-a naute hian tun season kal laiah league goal 68 khungin anmahni lamah goal 17 chiah a la lut, an sulhnu en chuan Inter lakah pawh an khelh fuh phawt chuan goal khung turin theihna an nei, si phurh belh huama an nawr dawn avangin a hmuhnawm ang.